തിരുവനന്തപുരത്ത് അഞ്ച് ഇൻഡിഗോ സർവീസുകൾ റദ്ദാക്കി; യാത്രാദുരിതം രൂക്ഷം

തിരുവനന്തപുരം: (KasargodVartha) രാജ്യവ്യാപകമായി യാത്രികരെ ദുരിതത്തിലാക്കിയ വ്യോമയാന മേഖലയിലെ താളംതെറ്റൽ രൂക്ഷമായി തുടരുന്നതിനിടെ, തിരുവനന്തപുരത്തുനിന്നുള്ള അഞ്ച് ഇൻഡിഗോ വിമാനങ്ങൾ കൂടി റദ്ദാക്കി. ഞായറാഴ്ച രാവിലെ ആറ് മണി മുതലുള്ള ആഭ്യന്തര സർവീസുകളാണ് ഇൻഡിഗോ ഒഴിവാക്കിയത്.

ഇൻഡിഗോയുടെ 500ൽ അധികം സർവീസുകൾ ശനിയാഴ്ച റദ്ദാക്കിയതിനെ തുടർന്ന് വിമാനത്താവളങ്ങളിൽ കേന്ദ്ര സർക്കാരിനെതിരെ ശക്തമായ പ്രതിഷേധം ഉയർന്നിരുന്നു. ഈ സാഹചര്യം മുതലെടുത്ത് മറ്റ് വ്യോമയാന കമ്പനികൾ ടിക്കറ്റ് നിരക്ക് കുത്തനെ വർദ്ധിപ്പിച്ചത് യാത്രക്കാരുടെ പ്രതിസന്ധി ഇരട്ടിയാക്കി. എല്ലാ സീമയും ലംഘിച്ചുള്ള ഈ നിരക്ക് വർദ്ധനവിൽ 'ആകാശക്കൊള്ളയാണ്' അരങ്ങേറിയതെന്ന പരാതി വ്യാപകമാണ്.

കേന്ദ്ര ഇടപെടൽ; നിരക്ക് പരിധി നിശ്ചയിച്ചു

അനിയന്ത്രിതമായ ടിക്കറ്റ് നിരക്ക് വർധന ശ്രദ്ധയിൽപ്പെട്ടതിനെ തുടർന്ന് കേന്ദ്ര വ്യോമയാന മന്ത്രാലയം ഇടപെട്ടു. ഡൽഹിയിൽ നിന്ന് കേരളത്തിലേക്കുള്ള വിമാന ടിക്കറ്റുകൾക്ക് ഒരു ലക്ഷത്തിലേറെ വരെയാണ് ഈടാക്കിയിരുന്നത്.

ഇതോടെയാണ് പ്രതിസന്ധിയിലായ റൂട്ടുകളിൽ വിമാന ടിക്കറ്റ് നിരക്കുകളിൽ പരിധി നിശ്ചയിക്കാൻ മന്ത്രാലയം തീരുമാനിച്ചത്. സ്ഥിതിഗതികൾ സ്ഥിരത കൈവരിക്കുംവരെ ഈ നിയന്ത്രണം തുടരും.

പുതിയ പരിധി അനുസരിച്ച്, 500 കിലോമീറ്റർ വരെയുള്ള യാത്രയ്ക്ക് 7,500 രൂപ, 500 കിലോമീറ്റർ മുതൽ 1,000 കിലോമീറ്റർ വരെ 12,000 രൂപ, 1,000 കിലോമീറ്റർ മുതൽ 1,500 കിലോമീറ്റർ വരെ 15,000 രൂപ, 1,500 കിലോമീറ്ററിന് മുകളിലുള്ള ടിക്കറ്റുകൾക്ക് 18,000 രൂപ എന്നിങ്ങനെയാണ് പരിധി നിശ്ചയിച്ചിട്ടുള്ളത്.

എങ്കിലും, സർക്കാർ പരിധി നിശ്ചയിച്ച നടപടി പൂർണ്ണമായി നടപ്പിലായിട്ടില്ല. 1,500 കിലോമീറ്ററിൽ കൂടുതൽ ദൈർഘ്യമുള്ള ഡൽഹി-കൊച്ചി യാത്രയ്ക്ക് നിശ്ചയിച്ചതിലും കൂടുതൽ നിരക്ക് ശനിയാഴ്ചയും ഈടാക്കിയതായി റിപ്പോർട്ടുണ്ട്.

യാത്ര മുടങ്ങിയവർക്ക് തുക തിരികെ നൽകണം

യാത്ര മുടങ്ങിയവർക്ക് ടിക്കറ്റ് തുക മടക്കി നൽകുന്നത് ഞായറാഴ്ച രാത്രി എട്ട് മണിക്ക് അകം പൂർത്തിയാക്കണമെന്ന് കേന്ദ്ര വ്യോമയാന മന്ത്രാലയം ഇൻഡിഗോയോട് നിർദേശിച്ചു. നിലവിലെ സാഹചര്യം മന്ത്രാലയം പ്രധാനമന്ത്രിയുടെ ഓഫീസിനെ അറിയിക്കുമെന്നും വ്യക്തമാക്കിയിട്ടുണ്ട്.

വ്യോമയാന മേഖല പൂർണ്ണമായി സ്വകാര്യവൽക്കരിച്ചതിൻ്റെ ദുരന്തമാണ് അനിയന്ത്രിതമായ ടിക്കറ്റ് വില വർധനയെന്ന പരാതി വ്യാപകമായി ഉയരുന്നുണ്ട്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായം കമൻ്റ് ചെയ്യുക. 

Article Summary: Five IndiGo flights canceled in Thiruvananthapuram; Centre imposes price cap on air tickets following widespread protests.

#IndiGoCancellation #AirTravelCrisis #Thiruvananthapuram #FlightFareCap #CentralGovt #Kerala