Budget Reform | 12 ലക്ഷം വരെ വരുമാനത്തിന് ഇനി നികുതി വേണ്ട; എത്രവരെ പണം ലാഭിക്കാം? അറിയാം വിശദമായി

ന്യൂഡൽഹി: (KasargodVartha)കേന്ദ്ര ധനമന്ത്രി നിർമ്മല സീതാരാമൻ അവതരിപ്പിച്ച ബജറ്റിൽ ഇടത്തരക്കാർക്ക് വലിയ ആശ്വാസം നൽകുന്ന പ്രഖ്യാപനം. പുതിയ നികുതി രീതിയിൽ 12 ലക്ഷം രൂപ വരെ വരുമാനത്തിന് ആദായ നികുതി അടയ്‌ക്കേണ്ടതില്ലെന്ന് ധനമന്ത്രി അറിയിച്ചു. സ്റ്റാൻഡേർഡ് ഡിഡക്ഷൻ കൂടി പരിഗണിക്കുമ്പോൾ 12.75 ലക്ഷം രൂപ വരെ നികുതി ഒഴിവാക്കാം. 

പ്രധാനമന്ത്രി നരേന്ദ്ര മോദി ഉൾപ്പെടെയുള്ള ഭരണപക്ഷം എംപിമാരുടെ ഹർഷാരവത്തോടെയാണ് ഈ പ്രഖ്യാപനം സ്വാഗതം ചെയ്തത്. നിലവിൽ ആദായ നികുതി പരിധി ഏഴ് ലക്ഷം രൂപയായിരുന്നു. ഒറ്റയടിക്ക് അഞ്ച് ലക്ഷത്തിന്റെ വർദ്ധനവാണ് ഉണ്ടായിരിക്കുന്നത്. ഓരോ മാസവും ഒരു ലക്ഷം വരെ വരുമാനം നേടുന്നവർക്ക് നികുതി നൽകേണ്ടി വരില്ല. ഇതിൽ 75,000 രൂപയുടെ ടാക്സ് ഡിഡക്ഷനും നൽകും.

വലിയ ലാഭം 

പുതിയ രീതിയിൽ 12 ലക്ഷം രൂപ വരുമാനമുള്ള ഒരു നികുതിദായകന് 80,000 രൂപയുടെ നികുതി ആനുകൂല്യം ലഭിക്കും. ഇത് നിലവിലെ നിരക്കുകൾ പ്രകാരം അടയ്‌ക്കേണ്ട നികുതിയുടെ 100% ആണ്. 18 ലക്ഷം രൂപ വരുമാനമുള്ള ഒരാൾക്ക് 70,000 രൂപയുടെ നികുതി ആനുകൂല്യം ലഭിക്കും. ഇത് നിലവിലെ നിരക്കുകൾ പ്രകാരം അടയ്‌ക്കേണ്ട നികുതിയുടെ 30% ആണ്. 25 ലക്ഷം രൂപ വരുമാനമുള്ള ഒരാൾക്ക് 1.10 ലക്ഷം രൂപയുടെ ആനുകൂല്യം ലഭിക്കും. ഇത് നിലവിലെ നിരക്കുകൾ പ്രകാരം അടയ്‌ക്കേണ്ട നികുതിയുടെ 25% ആണ്.

പുതിയ നികുതി സ്ലാബുകൾ

എല്ലാത്തരം ആദായനികുതിദായകർക്കും നികുതി സ്ലാബുകളിൽ ആനുകൂല്യങ്ങൾ ലഭിച്ചു.

0-4 ലക്ഷം രൂപ: നികുതിയില്ല
4-8 ലക്ഷം രൂപ: 5%
8-12 ലക്ഷം രൂപ: 10%
12-16 ലക്ഷം രൂപ: 15%
16-20 ലക്ഷം രൂപ: 20%
20-24 ലക്ഷം രൂപ: 25%
24 ലക്ഷത്തിനു മുകളിൽ: 30%

ഈ വാർത്ത പങ്കിടുകയും  അഭിപ്രായങ്ങൾ രേഖപ്പെടുത്തുകയും ചെയ്യുക.

 Finance Minister Nirmala Sitharaman announces tax relief with a new income tax structure, offering savings for taxpayers up to ₹12 lakh income.

 #IncomeTax #TaxRelief #Budget2025 #IndiaBudget #TaxReform #BudgetAnnouncement