ചട്ടഞ്ചാലിലെ മുഹമ്മദ് കുഞ്ഞിയുടെ അപകടമരണം; നാട് ദുഃഖസാന്ദ്രം

ചട്ടഞ്ചാല്‍: കര്‍ണാടക മടിക്കേരിയില്‍ ബൈക്കില്‍ ലോറിയിടിച്ച് മരണപ്പെട്ട ചട്ടഞ്ചാല്‍ പുത്തരിയടുക്കത്തെ പി. മുഹമ്മദ് കുഞ്ഞിയുടെ (24) മൃതദേഹം വെള്ളിയാഴ്ച രാവിലെ ചട്ടഞ്ചാല്‍ ജുമാമസ്ജിദ് ഖബര്‍സ്ഥാനില്‍ ഖബറടക്കി. നൂറുകണക്കിനാളുകള്‍ സംസ്‌ക്കാര ചടങ്ങില്‍ പങ്കെടുത്തു. മടിക്കേരിയിലെ സുഹൃത്തിന്റെ വിവാഹത്തില്‍ പങ്കെടുത്ത് വ്യാഴാഴ്ച ഉച്ചയ്ക്ക് നാട്ടിലേക്ക് മടങ്ങുമ്പോഴാണ് മടിക്കേരിക്കടുത്ത ദേവറകൊല്ലിയിലുണ്ടായ അപകടത്തില്‍ മുഹമ്മദ്കുഞ്ഞി മരണപ്പെട്ടത്.

ബൈക്കില്‍ പിറകിലിരുന്ന് സഞ്ചരിക്കുകയായിരുന്ന സുഹൃത്ത് ബെണ്ടിച്ചാലിലെ അഷിഖിന് (22) അപകടത്തില്‍ ഗുരുതരമായി പരിക്കേറ്റു. ആഷിഖ് മംഗലാപുരത്തെ സ്വകാര്യ ആശുപത്രിയില്‍ ചികിത്സയിലാണ്.

മുഹമ്മദ് കുഞ്ഞിയും ആഷിഖും സഞ്ചരിച്ച ബൈക്കില്‍ മടിക്കേരി ഭാഗത്തേക്ക് വെട്ടു കല്ലുമായി പോവുകയായിരുന്ന ലോറി ഇടിക്കുകയായിരുന്നു. ഇടിയുടെ ആഘാതത്തില്‍ റോഡിലേക്ക് തെറിച്ചുവീണ് സാരമായി പരിക്കേറ്റ ഇരുവരെയും ഓടിക്കൂടിയവര്‍ ഉടന്‍തന്നെ മംഗലാപുരത്തെ ആശുപത്രിയിലേക്ക് കൊണ്ടുപോയെങ്കിലും മുഹമ്മദ് കുഞ്ഞി അവിടെ എത്തുമ്പോഴേക്കും മരണപ്പെട്ടിരുന്നു.

അബുദാബിയില്‍ ജോലി ചെയ്ത് വന്നിരുന്ന മുഹമ്മദ് കുഞ്ഞി പിതാവ് ഇസ്മാഈലിന് സുഖമില്ലെന്ന വിവരമറിഞ്ഞാണ് അടുത്തിടെ നാട്ടില്‍ വന്നത്. ഒരു മാസം മുമ്പ് പിതാവ് മരണപ്പെടുകയും ചെയ്തു. അതിന്റെ നാല്‍പതാം നാള്‍ വരുന്ന ഞായറാഴ്ച ആചരിക്കാനിരിക്കുകയായിരുന്നു. ഇസമാഈലിന്റെ വിയോഗത്തിലുള്ള ദുഃഖം മായുംമുമ്പേയാണ് കുടുംബത്തിന് ആഘാതമുണ്ടാക്കി മുഹമ്മദ് കുഞ്ഞിയുടെയും മരണം സംഭവിച്ചത്. അടുത്ത് തന്നെ ഗള്‍ഫിലേക്ക് തിരിച്ച് പോകാനിരിക്കുകയായിരുന്നു മുഹമ്മദ് കുഞ്ഞി. ഗള്‍ഫില്‍ പോകുന്നതിന് മുമ്പ് നാട്ടില്‍ കൂലിപ്പണി എടുത്തിരുന്ന മുഹമ്മദ് കുഞ്ഞി പാവപ്പെട്ട കുടുംബത്തിന്റെ അത്താണിയായിരുന്നു. ഏഴ് ഇളയ സഹോദരങ്ങളാണ് മുഹമ്മദ് കുഞ്ഞിക്കുള്ളത്.

സുഹൃത്തിന്റെ വിവാഹത്തില്‍ പങ്കെടുക്കാന്‍ ബുധനാഴ്ചയാണ് പുത്തരിയടുക്കത്തെ ഏതാനും കൂട്ടുകാര്‍ ഒരുമിച്ച് മടിക്കേരിയിലേക്ക് പോയത്. മുഹമ്മദ് കുഞ്ഞിയും ആഷിഖും ബൈക്കിലും മറ്റുള്ളവര്‍ കാറിലുമായാണ് ആഹ്ലാദവും കളിചിരിയും പങ്കുവെച്ചു കൊണ്ട് യാത്ര ചെയ്തതും കല്യാണത്തില്‍ പങ്കെടുത്തതും. തിരിച്ച് വരുമ്പോള്‍ തങ്ങളുടെ കൂട്ടത്തിലുള്ള പ്രിയ സുഹൃത്തിനെ മരണം തട്ടിയെടുക്കുമെന്ന് ആരും കരുതിയിരുന്നതല്ല. മുഹമ്മദ് കുഞ്ഞിയുടെ അപകട മരണം കുടുംബത്തിനും നാടിനും കനത്ത ആഘാതമായി.

ഖദീജയാണ് മാതാവ്. സഹോദരങ്ങള്‍: യൂസുഫ്, ഇര്‍ഫാന്‍, ഇര്‍ഷാദ്, ഇമ്രാന്‍, മുഹ്‌സിന, റംല, ഫര്‍സാന.

Keywords:  Accident, Bike, Lorry, Chattanchal, Madikeri, Mangalore, Hospital, Kasaragod,  Kerala News, International News, National News, Gulf News, Health News, Educational News, Business News, Stock News, Gold News.