ബ്രിട്ടീഷ് എംബസിയുടെ സീല്‍ ഉപയോഗിച്ച് യുവാവില്‍ നിന്ന് ലണ്ടന്‍ സ്ഥാപനം പണം തട്ടി

കാഞ്ഞങ്ങാട്: ബ്രിട്ടീഷ് എംബസിയുടെ സീലും ഹൈക്കമ്മീഷണറുടെ ഒപ്പും ഉപയോഗിച്ച് ജോലിയുടെ പേരില്‍ യുവാവില്‍ നിന്നും ലണ്ടന്‍ കേന്ദ്രീകരിച്ചുള്ള സ്ഥാപനം പണം തട്ടിയെടുത്തു. മാനടുക്കം മുതുക്കാട്ടില്‍ ഹൗസില്‍ നിധിന്‍ ജോസഫി(22)ല്‍ നിന്നാണ് ലണ്ടനിലെ ബി ടി എ എന്റര്‍പ്രൈസസ് സ്ഥാപനത്തിന്റെ ഡയറക്ടര്‍മാരായ ടാറ്റിയാ മിര്‍വി, റുത്ത്‌സിവായോ, റേച്ചല്‍അന്ന, എസ് സപുനൂല്‍ എന്നിവര്‍ പണം തട്ടിയത്. നിധിന്‍ ജോസഫ് ഹോട്ടല്‍ മാനേജ്‌മെന്റ് പഠനം പൂര്‍ത്തിയാക്കി എറണാകുളം താജ് റസിഡന്‍സ് ഹോട്ടലില്‍ ജോലി ചെയ്തുവരികയാണ്.

കഴിഞ്ഞ രണ്ട് വര്‍ഷക്കാലമായി നിധിന് ഈ ഹോട്ടലില്‍ തന്നെയാണ് ജോലി. വിദേശ രാജ്യങ്ങളിലെവിടെയെങ്കിലും സ്ഥിരമായി ജോലി ലഭിക്കണമെന്നും അതുവഴി കുടുംബത്തെ രക്ഷിക്കണമെന്നുമുള്ള ആഗ്രഹം മൂലം ഇന്റര്‍നെറ്റ് മുഖാന്തിരം അന്വേഷണം നടത്തിയതില്‍ ടാറ്റിയാ മിര്‍വി ഉള്‍പ്പെടെയുള്ളവരുടെ സ്ഥാപനം യു കെ യില്‍ റോയല്‍പാര്‍ക്ക് ഹോട്ടലില്‍ ജോലി ശരിയാക്കാമെന്ന് വാഗ്ദാനം ചെയ്തിരുന്നു.

ഇതിന്റെ അടിസ്ഥാനത്തില്‍ അവര്‍ അറിയിച്ചതുപോലെ നിധിന്‍ ആവശ്യമുള്ള രേഖകള്‍ മെയില്‍ ചെയ്തു. നിധിന്റെ എല്ലാവിധ രേഖകളും സ്വീകരിച്ച ഡയറക്ടര്‍മാര്‍ ടെലിഫോണ്‍ വഴി നിധിനെ ഇന്റര്‍വ്യു ചെയ്യുകയും യുവാവ് അതില്‍ പാസാകുകയും ചെയ്തു. അതിന് ശേഷം വിസ പ്രൊസസിംഗിനായി 25,000 രൂപ ബി ടി എസ് എന്റര്‍പ്രൈസസിന്റെ അക്കൗണ്ട് നമ്പറില്‍ എച്ച് ഡി എഫ് സി കാഞ്ഞങ്ങാട് ബ്രാഞ്ചില്‍ നിന്ന് ഇക്കഴിഞ്ഞ ഫെബ്രുവരി 19ന് അയച്ചു കൊടുത്തു. ഇതിനു ശേഷം ഫെബ്രുവരി 22ന് ഇന്‍ഷൂറന്‍സ് ഫീസിനത്തില്‍ 42,112 രൂപ ടാറ്റിയാമിര്‍വിയുടെ ഐസിഐസിഐ അക്കൗണ്ട് നമ്പറില്‍ അടച്ചുകൊടുത്തു.

ഇതിനു ശേഷം സ്റ്റാമ്പ് ഫീസിനത്തില്‍ അവര്‍ ആവശ്യപ്പെട്ടതനുസരിച്ച് 17,000 രൂപ റുത്ത്‌സിവായോയുടെ അക്കൗണ്ടിലേക്ക് സ്റ്റേറ്റ് ബാങ്ക് ഓഫ് ഇന്ത്യ മുഖാന്തിരം അയച്ചു കൊടുത്തു. 84,112 രൂപ അയച്ചു കൊടുത്തതിനു ശേഷം വീണ്ടും 69,000 രൂപ അയച്ചുകൊടുക്കുന്നതിനായി ഡയറക്ടര്‍മാര്‍ നിധിനോട് നിരന്തരം ആവശ്യപ്പെട്ടുകൊണ്ടിരിക്കുകയാണ്. സംശയം തോന്നിയ നിധിന്‍ നടത്തിയ അന്വേഷണത്തില്‍ മേല്‍ വിവരിച്ച രീതിയില്‍ ലണ്ടനില്‍ ഒരു ഹോട്ടല്‍ പ്രവര്‍ത്തിക്കുന്നുണ്ടെങ്കിലും ഈ രീതിയില്‍ നിയമനം നടത്തുന്നില്ലെന്നാണ് അറിയാന്‍ കഴിഞ്ഞത്. അതുപോലെ തങ്ങളുടേതെന്ന് അവകാശപ്പെട്ട് പണം സ്വീകരിച്ച സ്ഥാപനവും വ്യക്തികളും അക്കൗണ്ട് നമ്പറുകളും വ്യാജമാണെന്ന് സംശയിക്കുന്നു.

ഈ രീതിയില്‍ പണാപഹരണം നടത്തിയവര്‍ മനപൂര്‍വം തന്നെ ചതിക്കുകയായിരുന്നുവെന്നും നിലവിലില്ലാത്ത രീതിയില്‍ പണം ആവശ്യപ്പെടുകയും പറഞ്ഞ് വിശ്വസിപ്പിച്ച് പണം അപഹരിക്കുകയുമാണ് ചെയ്തിരിക്കുന്നതെന്ന് നിധിന്‍ മുഖ്യമന്ത്രിക്ക് നല്‍കിയ പരാതിയില്‍ വ്യക്തമാക്കി. ഇതിനായി ബ്രിട്ടീഷ് എംബസിയുടെ സീലും ഹൈക്കമ്മീഷണറുടെ ഒപ്പും തയ്യാറാക്കി മെയിലില്‍ അയച്ചു കൊടുത്ത് നിധിനെ വഞ്ചിക്കുകയായിരുന്നു. അതുപോലെ നിധിന്‍ ഇതുവരെ അയച്ചുകൊടുത്ത പണത്തിന് യാതൊരു വിധ രസീതിയോ വിസയോ ലഭിച്ചിട്ടില്ല.

ഇക്കാര്യങ്ങള്‍ സൂചിപ്പിച്ച് നിധിന്‍ ജില്ലാ പോലീസ് സൂപ്രണ്ടിന് പരാതി നല്‍കിയെങ്കിലും തീരുമാനമുണ്ടായില്ല. ബി ടി എ എന്റര്‍പ്രൈസസ് ഡയറക്ടര്‍മാര്‍ക്കെതിരെയും സ്ഥാപനത്തിനെതിരെയും വേണ്ട അന്വഷണം നടത്തി അവരുടെ ഗുഢാലോചന വെളിച്ചത്തു കൊണ്ടുവരണമെന്നും നഷ്ടപ്പെട്ട പണം ഈടാക്കിത്തരാന്‍ ആവശ്യമായ നടപടി സ്വീകരിക്കണമെന്നും നിധിന്റെ പരാതിയില്‍ വ്യക്തമാക്കി.