ഓട്ടോറിക്ഷയില്‍ മദ്യക്കടത്ത്; ഡ്രൈവര്‍ അറസ്റ്റില്‍

കുമ്പള: (www.kasargodvartha.com 20.12.2018) ഓട്ടോറിക്ഷയില്‍ മദ്യം കടത്തുകയായിരുന്ന ഡ്രൈവറെ എക്‌സൈസ് സംഘം അറസ്റ്റു ചെയ്തു. ബായിക്കട്ടെ സ്വദേശി കെ സുന്ദര (30)യെയാണ് കുമ്പള എക്‌സൈസ് പ്രിവന്റീവ് ഓഫീസര്‍ എസ് ജേക്കബിന്റെ നേതൃത്വത്തിലുള്ള സംഘം അറസ്റ്റു ചെയ്തത്. ഇയാളില്‍ നിന്നും 180 മില്ലിയുടെ 30 ടെട്രാ പാക്കറ്റ് കര്‍ണാടക നിര്‍മിത വിദേശ മദ്യം പിടികൂടി.

ബുധനാഴ്ച വൈകിട്ട് അഞ്ചു മണിയോടെ ബായിക്കട്ടയില്‍ നിന്നും മിയാപ്പദവ് പോകുന്ന റോഡരികില്‍ വാഹന പരിശോധന നടത്തുന്നതിനിടെയാണ് മദ്യവുമായി സുന്ദര പിടിയിലായത്. സിവില്‍ എക്സൈസ് ഓഫീസര്‍മാരായ മൊയ്തീന്‍ സാദിഖ്, ലിജു ജെ എസ്, നിഖില്‍ പവിത്രന്‍, സുധീഷ് പി വി, ശരത് കെ പി എന്നിവരും മദ്യക്കടത്ത് പിടികൂടിയ സംഘത്തിലുണ്ടായിരുന്നു.