തൃക്കരിപ്പൂര്: ഇടയിലേക്കാട്-വലിയപറമ്പ് പാലം നിര്മ്മാണ പ്രവൃത്തിക്ക് വലിയപറമ്പ് കടലോരത്ത് നിന്നും മണല് എടുക്കുവാനുള്ള വികസന സമിതി തീരുമാനം നാട്ടുകാരുടെ എതിര്പ്പിനെ തുടര്ന്ന് ഉപേക്ഷിച്ചു. കരാറുകാരന്റെ അനാസ്ഥ മൂലം മന്ദഗതിയിലായ പാലം പണി ത്വരിതപ്പെടുത്തുന്നതിനെ കുറിച്ച് ആലോചിക്കാന് വ്യാഴാഴ്ച വൈകുന്നേരം വലിയപറമ്പ് ആശാന് സ്മാരക കലാസമിതി പരിസരത്ത് വെച്ച് യോഗം നടന്നത്. നൂറ് ലോഡ് കടല് മണല് എടുക്കുവാനുള്ള വികസന സമിതി തീരുമാനം യോഗത്തില് അവതരിപ്പിച്ചതോടെയാണ് നാട്ടുകാര് പ്രതിഷേധവുമായി രംഗത്ത് വരികയായിരുന്നു. ലവണാംശമുള്ളതും നേരിയതുമായ കടലോരത്തെ മണല് പാലം നിര്മ്മാണത്തിന് ഉപയോഗിക്കാന് പാടില്ലെന്ന അറിവുണ്ടായിട്ടും വലിയപറമ്പ് പഞ്ചായത്തിലെ രണ്ട് മുന് പ്രസിഡന്റുമാരുടെ നേതൃത്വത്തിലുള്ള സമിതിയുടെ തീരുമാനത്തെ ജനങ്ങള് ഒന്നടങ്കം എതിര്ക്കുകയായിരുന്നു. 2005ല് 7.80 കോടിരൂപ എസ്റ്റിമേറ്റില് ആരംഭിച്ച പാലം നിര്മ്മാണം കരാറുകാരന് പാതിവഴിയില് ഉപേക്ഷിച്ചിരുന്നു. പിന്നീട് എസ്റ്റിമേറ്റ് പുതുക്കി 14കോടിയാക്കിയെങ്കിലും പ്രവൃത്തി ഇഴയുകയാണ്. യോഗത്തില് ചെയര്മ്മാന് കെ പി അബ്ദുല് സലാംഹാജി അധ്യക്ഷത വഹിച്ചു. വാര്ഡ് മെമ്പര്മാരായ കൊളങ്കര രാമന്, ടി കെ നാരായണന് എന്നിവര് സംസാരിച്ചു. സി വി കണ്ണന് സ്വാഗതം പറഞ്ഞു.
Keywords: Kasaragod, Trikaripur, Bridge, Sand, Valiyaparamba, River
