മഞ്ചേശ്വരം ഗവ. കോളേജില്‍ കാഴ്ചയുടെ ഉത്സവം കഴിഞ്ഞു: അന്താരാഷ്ട്ര ചലചിത്ര ശില്പശാല സമാപിച്ചു

മഞ്ചേശ്വരം: മൂന്ന് ദിനരാത്രികളിലായി മഞ്ചേശ്വരം ഗോവിന്ദപൈ മെമ്മോറിയല്‍ കോളേജില്‍ നടന്നുവന്ന അന്താരാഷ്ട്ര ചലചിത്ര ശില്പശാല സമാപിച്ചു. ലോക പ്രസിദ്ധങ്ങളായ 25ലധികം കഥാചിത്രങ്ങളും ഹ്രസ്വചിത്രങ്ങളും ഡോക്യുമെന്റ്റികളും ആനിമേഷന്‍ ചിത്രങ്ങളും കോര്‍ത്തിണക്കി സമഗ്രമായ ഒരു ദൃശ്യാനുഭവം തന്നെ വിദ്യാര്‍ത്ഥികള്‍ക്ക് പകര്‍ന്നു നല്‍കിയാണ് ശില്പശാല സമാപിച്ചത്.

'മൈല്‍ സ്റ്റോണ്‍' എന്ന് പേരിട്ട ശില്പശാലയില്‍ പ്രാദേശിക ചലചിത്ര നിര്‍മ്മാണത്തിന്റെ സാധ്യതകള്‍, സിനിമ-ഫാന്‍സിയും യാഥാര്‍ത്ഥ്യവും, ഓര്‍മ്മ, പ്രമേയവും ആവിശ്കാരവും, നാടുകാണല്‍ ചലചിത്രപ്രതിഭകളോടൊത്ത്, ഓപ്പണ്‍ ഫോറം എന്നിങ്ങനെ വിവിധ സെഷനുകളിലായി ചലചിത്രകാരന്മാരായ സുദേവന്‍ അച്ച്യുതാനന്ദന്‍, പി. പ്രേമചന്ദ്രന്‍ കെ.വി. മണികണ്ഠദാസ്, ജി.ബി. വത്സന്‍, കെ.പി. ശശികുമാര്‍ തുടങ്ങിയവര്‍ ക്ലാസ്സുകളും ചര്‍ച്ചകളുമായി ആദ്യാവസാനം ക്യാമ്പിനെ സമ്പന്നമാക്കി.