ബിജെപി ഓഫീസുകള്‍ക്ക് നേരെ കല്ലേറ്; കാസര്‍കോട്ട് ഹര്‍ത്താല്‍

കാസര്‍കോട്: കറന്തക്കാട്ടെ ബിജെപി ജില്ലാ കമ്മിറ്റി ഓഫീസിനും താളിപ്പടുപ്പിലെ മാരാര്‍ജി സ്മാരക മന്ദിരത്തിനും നേര്‍ക്ക് അജ്ഞാതസംഘം കല്ലേറ് നടത്തി. അക്രമത്തില്‍ പ്രതിഷേധിച്ച് കാസര്‍കോട് മുനിസിപ്പല്‍ പരിധിയിലും മധൂര്‍, മൊഗ്രാല്‍പുത്തൂര്‍ പഞ്ചായത്തുകളിലും ശനിയാഴ്ച ഹര്‍ത്താലിന് ആഹ്വാനം നല്‍കിയതായി ബിജപി മണ്ഡലം സെക്രട്ടറി പി. രമേശന്‍ അറിയിച്ചു. നഗരത്തിലും പരിസരങ്ങളിലും ക്ഷേത്രോത്സവങ്ങളുടെ ഭാഗമായി ഉയര്‍ത്തിയ ഫഌക്‌സ് ബോര്‍ഡുകള്‍ നശിപ്പിച്ചതായും ബിജെപി നേതാവ് പറഞ്ഞു. ശനിയാഴ്ച പുലര്‍ച്ചെയാണ് അക്രമം നടന്നത്. ബൈക്കുകളിലെത്തിയ സംഘമാണ് ആസൂത്രിതമായി ഫഌക്‌സ് ബോര്‍ഡുകള്‍ മറ്റും കീറിയതെന്നും ബിജെപി കേന്ദ്രങ്ങള്‍ പറഞ്ഞു.

അതിനിടെ ഹര്‍ത്താല്‍ അനുകൂലികള്‍ രാവിലെ കറന്തക്കാട്ടും പരിസരങ്ങളിലും വാഹനങ്ങള്‍ തടഞ്ഞു. മംഗലാപുരം ഭാഗത്ത് നിന്ന് വരികയായിരുന്ന സ്വകാര്യ ബസിനു നേരെ കല്ലേറുണ്ടായി. അക്രമം പടരാതിരിക്കാന്‍ നഗരത്തില്‍ കനത്ത പോലീസ് ബന്തവബസ് ഏര്‍പ്പെടുത്തി. എ.എസ്.പി ടി.കെ ഷിബുവിന്റെ നേതൃത്വത്തില്‍ പോലീസ് പട്രോളിംഗ് നടത്തുന്നുണ്ട്. കണ്ണൂരില്‍ നിന്നും വരുന്ന ബസുകള്‍ ചെര്‍ക്കള വരേയും മംഗലാപുരം ഭാഗത്ത് നിന്നുള്ള ബസുകള്‍ കുമ്പളവരെയും മാത്രമേ സര്‍വ്വീസ് നടത്തുകയുള്ളൂവെന്നും ട്രാന്‍സ്‌പോര്‍ട്ട് അധികൃതര്‍ പറഞ്ഞു.