ബായാറില്‍ 2 വീടുകളില്‍ കവര്‍ച ; 20 പവനും കാല്‍ ലക്ഷം രൂപയും നഷ്ടപ്പെട്ടു
Nov 1, 2012, 15:00 IST
ബായാര്‍ ബേളുക്കട്ടയിലെ ഭാരത് ബീഡി കോണ്‍ട്രാക്ടര്‍ ബി.എം.ഹമീദിന്റെ വീടും തൊട്ടടുത്തുള്ള ബായാര്‍ പെട്രോള്‍പമ്പ് ഉടമയും ഗള്‍ഫുകാരനുമായ മൊയ്തീന്‍കുഞ്ഞിയുടെ വീട്ടിലുമാണ് കവര്‍ച ചെയ്തത്. ഹമീദിന്റെ ഇരുനില വീടിന്റെ പിന്‍ഭാഗത്ത് കോണിചാരിവെച്ച് മുകളില്‍ കയറിയ കവര്‍ചാ സംഘം മുകളിലത്തെ മൂന്ന് മുറികളിലുണ്ടായിരുന്ന അലമാരകളുടെ പൂട്ടുപൊളിച്ച് സാധനങ്ങള്‍ വാരിവലിച്ചിട്ട ശേഷം താഴെയുള്ള കിടപ്പുമുറിയില്‍ കയറി അലമാരയുടെ പൂട്ടുപൊളിച്ചാണ് 20 പവന്‍ സ്വര്‍ണാഭരണവും, 25,000 രൂപയും, റാഡോ വാച്ചും കൊളളയടിച്ചത്.
ഈ സമയം ഹമീദും, ഭാര്യയും മൂന്ന് മക്കളും, മാതാവും നല്ല ഉറക്കത്തിലായിരുന്നു. അര്‍ദ്ധരാത്രിയില്‍ വീട്ടിനുള്ളില്‍ ചെറിയ അനക്കം കേട്ടിരുന്നതായി ഹമീദിന്റെ മാതാവ് പറഞ്ഞു. എന്നാല്‍ ഉറക്കക്ഷീണത്തില്‍ അത് ശ്രദ്ധിച്ചില്ല. രാവിലെ ഉണര്‍ന്നെണീറ്റപ്പോഴാണ് വീട്ടുകാര്‍ കവര്‍ച നടന്നതായി അറിയുന്നത്. ഉടന്‍ പോലീസിനെ അറിയിച്ചു.
അതേ സമയത്താണ് തൊട്ടടുത്ത ബായാറിലെ പെട്രോള്‍പമ്പ് ഉടമയും ഗള്‍ഫുകാരനുമായ മൊയ്തീന്‍ കുഞ്ഞിയുടെ വീട്ടിലും കവര്‍ച നടന്നതായി വിവരം ലഭിച്ചത്. മൊയ്തീന്‍ കുഞ്ഞിയുടെ വീടിന് പിറകുവശത്തെ വാതില്‍ തകര്‍ത്ത് അകത്ത്കടന്ന മോഷ്ടാക്കള്‍ മുറിയുടെ പൂട്ട് പൊളിച്ച് അതിനുള്ളിലുണ്ടായിരുന്ന അലമാരയില്‍ നിന്നാണ് അഞ്ച് വാച്ചുകളും ഒരു മൊബൈല്‍ ഫോണും കവര്‍ച്ച ചെയ്തത്. ഈ വീടിന്റെ മുറ്റത്ത് നിര്‍ത്തിയിരുന്ന അയല്‍ക്കാരന്റെ ബൈക്കും കാണാതായിരുന്നു. ഈ ബൈക്ക് കയര്‍ക്കട്ടയില്‍ ഉപേക്ഷിക്കപ്പെട്ട നിലയില്‍ വ്യാഴാഴ്ച രാവിലെ കണ്ടെത്തി. മൊയ്തീന്‍ കുഞ്ഞും ഭാര്യയും രണ്ടുമക്കളും ബുധനാഴ്ച കുടുംബ വീട്ടില്‍ പോയതായിരുന്നു. വ്യാഴാഴ്ച രാവിലെ തിരിച്ചെത്തിയപ്പോഴാണ് കവര്‍ചാ വിവരമറിഞ്ഞത്. പോലീസ് സംഘവും ഡോഗ് സ്ക്വാഡും വിരലടയാള വിദഗ്ധരും സ്ഥലത്തെത്തി അന്വേഷണം ആരംഭിച്ചിട്ടുണ്ട്.
Keywords: Theft, House, Gold, Uppala, Mobile-Phone, Petrol-Pump, Kasaragod, Kerala, Bed Room, Night
Tags
Share this story
