പുതിയ കാലത്തോട് ഓര്‍മ്മ ചൊല്ലി ഗാന്ധി ഡോക്യുഫിക്ഷന്‍

നീലേശ്വരം: സ്വാതന്ത്ര്യ സമര ചരിത്ര പഠന കേന്ദ്രം നിര്‍മ്മിക്കുന്ന 'ഗാന്ധി' ഡോക്യുഫിക്ഷന്‍ സ്വിച്ച് ഓണ്‍ കര്‍മ്മം നീലേശ്വരം ഗാന്ധിസ്മൃതി മണ്ഡപത്തില്‍ മലബാര്‍ വാര്‍ത്ത മാനേജിംഗ് എഡിറ്റര്‍ ബഷീര്‍ ആറങ്ങാടി നിര്‍വ്വഹിച്ചു. മലയാളം, ഹിന്ദി, ഇംഗ്ലീഷ് തുടങ്ങിയ ഭാഷകളിലാണ് ചലച്ചിത്രം പുറത്തിറങ്ങുന്നത്.

ലോക ഗിന്നസ്താരം മകാരം മത്തായിയാണ് ഗാന്ധിയായി വേഷമിടുന്നത്. ഗാന്ധിയന്‍ ഡോ.ടി.എം.സുരേന്ദ്രനാഥ് പ്രധാന വേഷത്തില്‍ പ്രത്യക്ഷപ്പെടുന്നു. സംവിധാനം കെ.ബാബുരാജ്. ക്യാമറ: ജെയിംസ് ഇടപ്പള്ളി. ഗാനരചന: രതീഷ് താമരശ്ശേരി. കലാസംവിധാനം: യു.വി.ജി.

ജാതിയുടെയും മതത്തിന്റെയും പേരില്‍ മനുഷ്യര്‍ തമ്മിലടിക്കുന്ന വര്‍ത്തമാനകാലത്ത് അതിനെതിരെയുള്ള ബോധവല്‍ക്കരണമാണ് സിനിമ ലക്ഷ്യമിടുന്നത്. ചടങ്ങില്‍ ഡോ.ടി.എം.സുരേന്ദ്രനാഥ് അധ്യക്ഷത വഹിച്ചു. കെ.നാരായണന്‍ മാസ്റ്റര്‍, സ്വാതന്ത്ര്യ സമര സേനാനി കെ.ആര്‍.കണ്ണന്‍, കുന്നുമ്മല്‍ രാജന്‍, കൈപ്രത്ത് കൃഷ്ണന്‍ നമ്പ്യാര്‍, പുല്യോട്ട് കൃഷ്ണന്‍, കെ.എം.ശ്രീധരന്‍, കെ.എം.ബാലകൃഷ്ണന്‍, വി.വിജയകുമാര്‍, മൂസ പാട്ടില്ലത്ത്, അഡ്വ.രാജേഷ് ഇടത്തട്ട്, പെരിങ്ങോം പ്രസ്‌ഫോറം സെക്രട്ടറി പെരിങ്ങോം ഹാരിസ്, കെ.വി.രാജേഷ് എന്നിവര്‍ സംസാരിച്ചു.

സ്വിച്ച് ഓണ്‍ കര്‍മ്മത്തിന് മുന്നോടിയായി ഗാന്ധിസ്മൃതി മണ്ഡപത്തില്‍ പുഷ്പാര്‍ച്ചന നടന്നു. പുഷ്പാര്‍ച്ചനയ്ക്ക് സ്വാതന്ത്ര്യ സമര സേനാനി കെ.ആര്‍.കണ്ണന്‍ നേതൃത്വം നല്‍കി. പുല്യോട്ട് കണ്ണന്‍ ദേശഭക്തിഗാനം അവതരിപ്പിച്ചു. 'മ'കാരം മത്തായിയുടെ 'മ'കാരത്തിലുള്ള ഗാന്ധിപ്രഭാഷണവും നടന്നു.