പാഴ്‌വസ്തുക്കളില്‍ തീര്‍ത്ത ഗിത്താറില്‍ ബഷീര്‍ ആലപിക്കുന്നു, അനശ്വര ഗാനങ്ങള്‍

പാഴ്‌വസ്തുക്കള്‍ കൊണ്ട് ഗിത്താര്‍മാത്രമല്ല, തീവണ്ടിയും വിമാനവും മറ്റും ബഷീര്‍ ഉണ്ടാക്കിയിട്ടുണ്ട്. പത്തു വര്‍ഷം മുമ്പ് ഉണ്ടാക്കിയ ഗിത്താറിന്റെ പരിഷ്‌കൃതരൂപമാണ് ഇപ്പോഴത്തേത്. കുട്ടിയായിരിക്കുമ്പോള്‍ പിതാവിന്റെ തളങ്കരയിലുണ്ടായിരുന്ന തുണിക്കടയിലേക്ക് വസ്ത്രങ്ങള്‍ക്കൊപ്പം വരികയായിരുന്ന കാര്‍ഡ് ബോര്‍ഡ് കൈക്കലാക്കിയാണ് ബഷീര്‍ തന്റെ കരവിരുതുകള്‍ പ്രകടിപ്പിക്കാന്‍ തുടങ്ങിയത്. ഓട്ടോറിക്ഷ, ബസ് തുടങ്ങിയ വാഹനങ്ങളുടെ മാതൃകകള്‍ ഉണ്ടാക്കിക്കൊണ്ടായിരുന്നു തുടക്കം. പിന്നീട് അത് ഗിത്താര്‍ ഉണ്ടാക്കാന്‍ പര്യാപ്തമായരീതിയില്‍ വികസിക്കുകയായിരുന്നു.

പത്രങ്ങളിലെ കൗതുകവാര്‍ത്തകളുടെ ശേഖരണമാണ് ബഷീറിന്റെ മറ്റൊരു ഹോബി. പ്രകൃതി ജീവനത്തില്‍ അധിഷ്ഠിതമാണ് അദ്ദേഹത്തിന്റെ ഭക്ഷണവും ദൈനം ദിന പ്രവര്‍ത്തനങ്ങളും. വായന ബഷീറിന്റെ ഒരു ദൗര്‍ബല്യമാണ്. എന്തുകിട്ടിയാലും വായിക്കും. വായനക്കായി മണിക്കൂറുകളാണ് അദ്ദേഹം കാസര്‍കോട് മുനിസിപ്പല്‍ ലൈബ്രറിയില്‍ ചിലവഴിക്കുന്നത്. നിരവധി
വേദികളില്‍ ബഷീര്‍, മുഹമ്മദ് റാഫിയുടെ ഗാനങ്ങള്‍ ആലപിച്ച് പ്രശംസ പിടിച്ചുപറ്റിയിട്ടുണ്ട്. കാസര്‍ക്കോട്ട് നിന്ന് ചിത്രീകരിച്ച വാര്‍ ആന്റ് പീസ്, റാപ്പിഡ് ആക്ഷന്‍ ഫോഴ്‌സ് എന്നീ സിനിമകളില്‍ ചെറിയ വേഷങ്ങളില്‍ പ്രത്യക്ഷപ്പെട്ടിട്ടുണ്ട്. സിനിമാ ഭ്രാന്ത് മൂത്ത് ചെന്നൈയിലെത്തി മമ്മുട്ടി, മോഹന്‍ലാല്‍, യേശുദാസ് തുടങ്ങിയവരോട് അടുപ്പം സ്ഥാപിക്കാനും ബഷീറിന് കഴിഞ്ഞു.

സൗദി, ഖത്തര്‍, മുംബൈ എന്നിവിടങ്ങളില്‍ ദീര്‍ഘകാലം വിവിധ ജോലികളില്‍ ഏര്‍പ്പെട്ട ബഷീര്‍ താന്‍ ബാലവേലയുടെ ഇരയായിരുന്നുവെന്ന് നിരവധി
അനുഭവങ്ങള്‍ നിരത്തിവെച്ച് വ്യക്തമാക്കുന്നു. നാട്ടിലും മുംബൈയിലുമായിരുന്നു അദ്ദേഹത്തിന്റെ വിദ്യാഭ്യാസം. ബന്ധുവിന്റെ നെല്ലിക്കട്ടയിലുള്ള സ്ഥാപനത്തില്‍ ജോലിചെയ്താണ് ബഷീര്‍ ഭാര്യയും മൂന്ന് മക്കളുമടങ്ങുന്ന കുടുംബത്തെ പുലര്‍ത്തുന്നത്. ജീവിതപ്രാരാബ്ധങ്ങള്‍ക്കിടയിലും തന്റെ കലാബോധം അണയാതെ സൂക്ഷിക്കാന്‍ ഏറെ പരിശ്രമിക്കുകയാണ് ഈ യുവാവ്. തന്റെ കഴിവുകള്‍ കണ്ടറിഞ്ഞ് ആളുകള്‍ പ്രശംസിക്കുമ്പോള്‍ താന്‍ ആദരിക്കപ്പെടുകയാണെന്ന് ബഷീര്‍ തിരിച്ചറിയുന്നു.