കെ.എം അഹ്മദ് നാടിന്റെ മതേതര സംസ്‌കാരത്തിന് വേണ്ടി നിലകൊണ്ടു: സാറാ അബൂബക്കര്‍

കാസര്‍കോട്: കെ.എം അഹമ്മദ് നാടിന്റെ മതേതര സംസ്‌കാരം നിലനിര്‍ത്തുന്നതിനും പോഷിപ്പിക്കുന്നതിനും വേണ്ടി നിലകൊണ്ട മാതൃകാ പത്രപ്രവര്‍ത്തകനായിരുന്നുവെന്ന് പ്രശസ്ത കന്നഡ നോവലിസ്റ്റ് സാറാ അബൂബക്കര്‍ അഭിപ്രായപ്പെട്ടു. കാസര്‍കോട് പ്രസ്‌ക്ലബ്ബിന്റെ ആഭിമുഖ്യത്തില്‍ നടത്തിയ കെ.എം അഹമ്മദിന്റെ മൂന്നാം ചരമ വാര്‍ഷിക ദിനാചരണം ഉദ്ഘാടനം ചെയ്ത് പ്രസംഗിക്കുകയായിരുന്നു അവര്‍.

കെ.എം അഹമ്മദ് കേവലം പത്രപ്രവര്‍ത്തകന്‍ മാത്രമായിരുന്നില്ല. കവിയും നാടിന്റെ വികസനം സ്വപ്‌നം കണ്ട് ഉല്‍പതിഷ്ണുവായ സാമൂഹ്യ പ്രവര്‍ത്തകന്‍ കൂടിയായിരുന്നുവെന്നും അവര്‍ പറഞ്ഞു. വര്‍ഗീയ ചേരിതിരിവുകള്‍ നാട്ടിലെമ്പാടും ഉടലെടുക്കുന്ന സ്ഥിതിയാണ് ഇപ്പോഴുള്ളത്. അതിനെതിരെ നന്മയുടെ പക്ഷത്ത് നിന്ന് തൂലിക ചലിപ്പിക്കാന്‍ പത്രപ്രവര്‍ത്തകര്‍ക്ക് കഴിയണമെന്ന് അവര്‍ അഭിപ്രായപ്പെട്ടു.
കെ.എം അഹമ്മദിന്റെ സംഭാവനകള്‍ വേണ്ടരീതിയില്‍ വിലയിരുത്തപ്പെട്ടിട്ടില്ലെന്ന് അനുസ്മരണ പ്രഭാഷണം നടത്തിയ ഡോ. അംബികാസുതന്‍ മാങ്ങാട് പറഞ്ഞു. ജില്ലയുടെ രൂപീകരണത്തില്‍ മഹത്തായ പങ്കുവഹിച്ച ഒരു പത്രപ്രവര്‍ത്തനാണ് കെ.എം അഹമ്മദ്. ഹൃദയംകൊണ്ട് സംസാരിക്കുന്ന മികച്ച പ്രഭാഷകനായ അഹമ്മദ് എഴുത്തിലൂടെ തന്റെ ദേശത്തിന്റെ പൊലിമ അടയാളപ്പെടുത്തിയെന്നും അദ്ദേഹം കൂട്ടിച്ചേര്‍ത്തു.

കാസര്‍കോടിന്റെ സാമൂഹിക വികസന രംഗങ്ങളില്‍ പുതിയ അവബോധം സൃഷ്ടിച്ച പത്രപ്രവര്‍ത്തകനാണ് കെ.എം അഹമ്മദെന്ന് റഹ്മാന്‍ തായലങ്ങാടി അഭിപ്രായപ്പെട്ടു. കെ.എം അഹമ്മദ് ഇല്ലാത്ത കാസര്‍കോട്ടെ പത്രപ്രവര്‍ത്തന - സാംസ്‌കാരിക മേഖലയില്‍ എന്തിന്റെയൊക്കെയോ കുറവ് അനുഭവപ്പെടുന്നുണ്ടെന്ന് ഇ. ചന്ദ്രശേഖര്‍ എം.എല്‍.എ പറഞ്ഞു.