കഞ്ചാവ് ഉപയോഗിക്കുന്ന വിവരം പുറത്തുപറഞ്ഞുവെന്നാരോപിച്ച് യുവാവിനെ അഞ്ചംഗ സംഘം മാരകമായി വെട്ടിപ്പരിക്കേല്‍പ്പിച്ചു, പുറത്ത് വെട്ടേറ്റ യുവാവിന് 17 തുന്നിക്കെട്ടുകള്‍

By Web Desk SUOct 18, 2017, 13:44 IST

കാസര്‍കോട്: (www.kasargodvartha.com) കഞ്ചാവും മദ്യവും ഉപയോഗിക്കുന്ന വിവരം പുറത്തുപറഞ്ഞുവെന്നാരോപിച്ച് യുവാവിനെ അഞ്ചംഗ സംഘം മാരകമായി വെട്ടിപ്പരിക്കേല്‍പ്പിച്ചു. നെല്ലിക്കുന്ന് ചേരങ്കൈ കടപ്പുറത്തെ ഹസൈനാറിന്റെ മകന്‍ അസ്ലം ഇല്യാസിനെയാണ് വെട്ടിപ്പരിക്കേല്‍പ്പിച്ചത്. തെങ്ങില്‍ കയറുമ്പോള്‍ ഉപയോഗിക്കുന്ന കത്തി കൊണ്ട് പുറത്ത് വെട്ടേറ്റ യുവാവിന് 17 തുന്നിക്കെട്ടുകള്‍ ഇട്ടു.

ചൊവ്വാഴ്ച രാത്രി 8.30 മണിയോടെ ജോലി കഴിഞ്ഞ് വന്ന് റോഡരികില്‍ നില്‍ക്കുകയായിരുന്ന ഇല്യാസിനെ അഞ്ചംഗ സംഘം അക്രമിക്കുകയായിരുന്നു. തങ്ങള്‍ കഞ്ചാവ് ഉപയോഗിക്കുന്നതും മദ്യപിക്കുന്നതും പുറത്ത് പറയുന്നത് ഇല്യാസും മറ്റൊരു സുഹൃത്തുമാണെന്നാണ് സംഘം ആരോപിച്ചത്.