എഴുത്ത് കാലത്തിനൊത്ത് നവീകരിക്കണം: ടി ഡി രാമകൃഷ്ണന്‍

By Web Desk SNAug 27, 2017, 12:13 IST

കാസര്‍കോട്: (www.kasargodvartha.com 27/08/2017) സപ്തകം കൂട്ടായ്മയുടെ ആഭിമുഖ്യത്തില്‍ സംഘടിപ്പിച്ച സപ്തകം 2017 ന്റെ ഉദ്ഘാടനം പ്രശസ്ത നോവലിസ്റ്റ് ടി ഡി രാമകൃഷ്ണന്‍ നിര്‍വ്വഹിച്ചു. എഴുത്ത് കാലത്തിനൊത്ത് നവീകരിക്കണം. സൈബര്‍കാല വായനയുടെയും എഴുത്തിന്റെയും ഉപകരണങ്ങള്‍ ആര്‍ജ്ജിക്കാന്‍ നാം സര്‍വ്വാത്മനാ ശീലിക്കണമെന്നും അദ്ദേഹം അഭിപ്രായപ്പെട്ടു.

സൈബര്‍കാല വായനയുടെ സെമിനാറില്‍ ചെറുകഥാകൃത്ത് കെ പി സുധീര, കന്നട ബുക്ക് അതോറിറ്റി ചെയര്‍മാന്‍ പ്രദീപ് കുമാര്‍ കല്‍ക്കൂറ, കന്നട കവയിത്രി ഡോ മീനാക്ഷി എന്നിവര്‍ പ്രബന്ധം അവതരിപ്പിച്ചു. കവി സുറാബ് അധ്യക്ഷത വഹിച്ചു. ചടങ്ങില്‍ വെച്ച് പ്രശസ്ത നിരൂപകന്‍ ഇബ്രാഹിം ബേവിഞ്ചയെയും ചിത്രകാരന്‍ സി കുഞ്ഞമ്പു മാസ്റ്ററെയും ആദരിച്ചു.

രാഘവന്‍ ബെള്ളിപ്പാടി ആദരഭാഷണം നടത്തി. ബംഗളൂരുവിലെ കെ ആര്‍ കിഷോര്‍, സാഹിത്യവേദി സെക്രട്ടറി പുഷ്പാകരന്‍ ബെണ്ടിച്ചാല്‍, പുകാസ ഏരിയാ സെക്രട്ടറി കെ എം ബാലകൃഷ്ണന്‍, എ എസ് മുഹമ്മദ് കുഞ്ഞി, പ്രതിഭാ രാജന്‍, രമാ പ്രസന്ന പിഷാരടി എന്നിവര്‍ ആശംസകള്‍ നേര്‍ന്നു. ഉണ്ണികൃഷ്ണന്‍ അണിഞ്ഞ സ്വാഗതവും അതീഖ് ബേവിഞ്ച നന്ദിയും പറഞ്ഞു.

ഉച്ചയ്ക്ക് ശേഷം നടന്ന കാവ്യപ്പൊലിമ പവിത്രന്‍ തീക്കുനി ഉദ്ഘാടനം ചെയ്തു. സപ്തഭാഷാ കവികളായ രാധാകൃഷ്ണ ഉളിയത്തടുക്ക, ദിവാകരന്‍ വിഷ്ണുമംഗലം, രാധാകൃഷ്ണന്‍ പെരുമ്പള, പി എസ് ഹമീദ്, മാധവന്‍ പുറച്ചേരി, ഹരീഷ് ഒഡ്ഡബെട്ടു, അശോക് കുമാര്‍ കാസര്‍കോട് തുടങ്ങി നാല്‍പ്പത്തിമൂന്നോളം കവികള്‍ കവിതകള്‍ അവതരിപ്പിച്ചു. നാലപ്പാടം പദ്മനാഭന്‍ അധ്യക്ഷനായിരുന്നു. പി വിനയകുമാര്‍ സ്വാഗതവും സ്വാഗതവും രവീന്ദ്രന്‍ പെരുമ്പള നന്ദിയും പറഞ്ഞു.