ആഘോഷങ്ങള്‍ക്കു കൊഴുപ്പേകാന്‍ വനിതാ വാദ്യ സംഘം
Apr 20, 2012, 15:29 IST
പട്ടികജാതി വികസന വകുപ്പിന്റെ ക്രിട്ടിക്കല്‍ ഗ്യാപ്പ് ഫില്ലിംഗ് പില്‍ നിന്നും തൊഴില്‍ രഹിതരായ പട്ടികജാതി വനിതകള്‍ക്കു സംഗീതോപകരണങ്ങള്‍ അനുവദിക്കുവാന്‍ സര്‍ക്കാര്‍ ഉത്തരവായതാണ് ജില്ലയിലെ വനിതാ വാദ്യ സംഘങ്ങള്‍ക്കു തുണയായത്. പഞ്ചാരിയും ശിങ്കാരിയും കൊട്ടിക്കയറാനും താള മേളങ്ങള്‍ക്ക് പെരുക്കം നല്‍കാനും ഇനി വളയിട്ട കൈകള്‍. ജില്ലയിലെ ആഘോഷങ്ങള്‍ക്കു കൊഴുപ്പേകാന്‍ വനിത വാദ്യ സംഘങ്ങള്‍ സര്‍വ്വ സജ്ജം.
ഉപകരണങ്ങള്‍ കൈമാറുന്നതോടനുബന്ധിച്ച് കാസര്‍കോട് കളടക്ടറേറ്റ് വളപ്പില്‍ ഇരു സംഘങ്ങളും വാദ്യ മേളം അവതരിപ്പിച്ചപ്പോള്‍ നൂറു കണക്കിനു ജീവനക്കാരടക്കം അനേകമാളുകള്‍ കാണികളായി. കളക്ടറേറ്റ് ഹാളില്‍ നടന്ന ചടങ്ങില്‍ ജില്ലാ പഞ്ചായത്ത് പ്രസിഡന്റ് അഡ്വ. പി.പി ശ്യാമളദേവി, ജില്ലാ കളക്ടര്‍ വി. എന്‍. ജിതേന്ദ്രന്‍ എന്നിവര്‍ വാദ്യോപകരണങ്ങളുടെ വിതരണം നിര്‍വഹിച്ചു. ജില്ലാ പട്ടികജാതി വികസന ഓഫീസര്‍ ഇന്‍ ചാര്‍ജ് സി. ലീലാവതി സ്വാഗതം പറഞ്ഞു.
നീലേശ്വരം കൊട്ടറ വനിതാ വാദ്യ സംഘത്തിനു അനുവദിച്ചത് 1,68,300 രൂപയുടെ സഹായം. 18 പേര്‍ക്കായി 14 ചെണ്ടയും 4 ഇലത്താളവും, മേശ, ഏഴ് കസേര, യൂണിഫോം എല്ലാമായപ്പോള്‍ വാദ്യ സംഘം പൂര്‍ണ്ണ സജ്ജം. ഇതിനകം 10 ലേറെ കേന്ദ്രങ്ങളില്‍ ഉത്സവങ്ങളിലും മറ്റു ആഘോഷങ്ങളിലും കഴിവ് തെളിയിച്ചിട്ടുള്ള ഈ സംഘങ്ങള്‍ ഇതുവരെ വാടകക്ക് വാദ്യോപകരണങ്ങള്‍ സംഘടിപ്പിച്ച് പരിപാടി അവതരിപ്പിക്കുകയായിരുന്നു. അമിത വാടക നല്‍കേണ്ടി വന്നിരുന്നതിനാല്‍ ഏറെ ബുദ്ധിമുട്ട് അനുഭവിച്ചിരുന്നു. ഈ സാഹചര്യത്തിലാണ് സഹായത്തിനായി പട്ടികജാതി വികസന വകുപ്പിനെ സമീപിക്കുന്നതും സര്‍ക്കാര്‍ സഹായം അനുവദിക്കുന്നതും. വനിതാ വാദ്യ സംഘം എന്ന നിലയില്‍ പേരെടുത്ത സംഘങ്ങള്‍ക്കു സര്‍ക്കാര്‍ സഹായം ഏറെ അനുഗ്രഹമായതായി സംഘം ഭാരവാഹികള്‍ പറഞ്ഞു.
Keywords: Lady vadyasangam, Kasaragod
Tags
Share this story
