വിഷുവെത്തിയതോടെ സജീവമായി പടക്കവിപണിയും; ആവേശത്തില്‍ കച്ചവടക്കാര്‍

കണ്ണൂര്‍: (www.kasargodvartha.com 14.04.2022) വിഷു ആഘോഷങ്ങള്‍ ഇത്തവണ നേരത്തെ തന്നെ തുടങ്ങിയിരിക്കുകയാണ്. പടക്കകച്ചവടക്കാരും ഇത്തവണ ആവേശത്തിലാണ്. കാരണം കഴിഞ്ഞ രണ്ട് വര്‍ഷം കോവിഡ് ഭീതിയും നിയന്ത്രണങ്ങളും നിലനില്‍ക്കെ ആഘോഷങ്ങളൊന്നുമില്ലാതെയാണ് വിഷു കടന്നുപോയത്. അതിനാല്‍ പടക്ക വിപണിയില്‍ നല്ല തിരക്കാണ് അനുഭവപ്പെടുന്നത്. പതിവുപോലെ ചൈനീസ് പടക്കങ്ങള്‍ക്കാണ് ആവശ്യക്കാരേറെ. ഇതിനൊപ്പം കുട്ടികള്‍ക്കായുള്ള പ്രത്യേക പടക്കങ്ങളുടെ വിപണിയും പൊടിപൊടിക്കുകയാണ്.

35 രൂപ മുതല്‍ 12,000 രൂപ വരെയുള്ള പടക്കങ്ങള്‍ വിപണിയിലുണ്ട്. 500,1000,1500 രൂപ നിരക്കിലുള്ള പടക്ക കിറ്റുകളും ലഭ്യമാണ്. നിറങ്ങള്‍ വാരിവിതറുന്ന പടക്കങ്ങള്‍ക്കാണ് ഇപ്പോള്‍ ഏറെ പ്രിയമെങ്കിലും കാതടപ്പിക്കുന്ന ശബ്ദത്തോടെ പൊട്ടുന്ന പടക്കങ്ങളുടെ പ്രതാപം ഒട്ടും കുറഞ്ഞിട്ടുമില്ല.