Human skelton found | കോലുവള്ളിയിലെ കിണറ്റില്‍ കണ്ടെത്തിയത് മനുഷ്യന്റെ അസ്ഥികൂടമെന്ന് തിരിച്ചറിഞ്ഞു: പൊലീസ് അന്വേഷണം ശക്തമാക്കി

കണ്ണൂര്‍: (www.kasargodvartha.com) ചെറുപുഴ പൊലീസ് സ്റ്റേഷന്‍ പരിധിയിലെ കോലുവള്ളിക്ക് സമീപം വ്യക്തിയുടെ പറമ്പിലെ കിണറില്‍ കണ്ടെത്തിയ അസ്ഥികൂടം മനുഷ്യന്റെതാണെന്ന് തിരിച്ചറിഞ്ഞു.
 
 
കള്ളപ്പാത്തി റോഡരികിലുള്ള കിണറിലാണ് അസ്ഥികൂടം കണ്ടെത്തിയത്. കഴിഞ്ഞ ദിവസം അസ്ഥികൂടമെന്ന് സംശയിക്കുന്ന വസ്തു കണ്ട വിവരമറിഞ്ഞ് ചെറുപുഴ പൊലീസ് സ്ഥലത്തെത്തി പരിശോധന നടത്തിയെങ്കിലും വെളിച്ചക്കുറവുമൂലം തിങ്കളാഴ്ചത്തേയ്ക്ക് അന്വേഷണം മാറ്റുകയായിരുന്നു. തിങ്കളാഴ്ച കിണറിലെ വെള്ളം വറ്റിച്ചു പരിശോധന നടത്തി. ഫോറന്‍സിക് വിഭാഗവും പൊലീസ് നായയും സ്ഥലത്തെത്തിയിരുന്നു. ചെളിയുള്ളതിനാല്‍ അതും നീക്കം ചെയ്താണ് അസ്ഥികൂടം പുറത്തെടുത്തത്.

രണ്ട് മാസം മുമ്പ് അടയ്ക്ക ശേഖരിക്കാന്‍ എത്തിയവരാണ് ഇവ ആദ്യം കണ്ടതെങ്കിലും ഞായറാഴ്ചയാണ് ഇവര്‍ നാട്ടുകാരോട് വിവരം പറഞ്ഞത്. തുടര്‍ന്നു നാട്ടുകാര്‍ പൊലീസില്‍ വിവരം അറിയിച്ചു. ചെറുപുഴ എസ്ഐ എം പി ഷാജിയുടെ നേതൃത്വത്തിലുള്ള സംഘം സ്ഥലത്തെത്തി പരിശോധന നടത്തിയാണ് അസ്ഥികൂടം മനുഷ്യന്റേത് തന്നെയെന്ന് സ്ഥിരീകരിച്ചത്. കിണറില്‍ നിന്നും ചെരുപ്പും ഷര്‍ടും ലഭിച്ചിട്ടുണ്ട്. പ്രദേശത്ത് ആരെങ്കിലും അപ്രത്യക്ഷരായിട്ടുണ്ടോ എന്നതില്‍ പൊലീസ് അന്വേഷണം നടത്തിവരികയാണ്. മനുഷ്യാസ്ഥികൂടം വിശദ പരിശോധനയ്ക്കായി അയച്ചിരിക്കുകയാണ്.