എഞ്ചിനീയറിംങ് റാങ്കിന്റെ തിളക്കവുമായി കൂട്ടുകാരികള്‍

പിലിക്കോട്: (www.kasargodvartha.com 09.11.2014) കളിചിരി തമാശകള്‍ക്കൊപ്പം പരീക്ഷ കഴിഞ്ഞ് റിസള്‍ട്ട് വന്നപ്പോള്‍ പഠനത്തിലും സുഹൃത്തുക്കളായ മൂവര്‍ സംഘം നാടിന്റെ  തിളക്കമായി. പയ്യന്നൂര്‍ ശ്രീനാരായണ ഗുരു കോളജ് ഓഫ് എഞ്ചിനീയറിങ് വിദ്യാര്‍ഥികളായ യാസ്മിനും അളകയും ശ്രുതി മോഹനും ആണ് കണ്ണൂര്‍ സര്‍വകലാശാലയുടെ ഒന്നും രണ്ടും റാങ്ക് നേടിയത്.

കമ്പ്യൂട്ടര്‍ സയന്‍സ് ആന്റ് എഞ്ചിനീയറിങ് വിഭാഗത്തില്‍ ചെറുവത്തൂര്‍ കുഴിഞ്ഞടി സ്വദേശിനിയായ ബി യാസ്മിന് ഒന്നാം റാങ്കാണ് ലഭിച്ചത്. അല്‍ഖ്വാദിരിയ മന്‍സിലിലെ മൗലാനാ അബ്ദുല്‍ ഖാദര്‍-സുഹറ ദമ്പതികളുടെ മകളാണ്.

ഇലക്ട്രിക്കല്‍ ആന്റ് ഇലക്ട്രോണിക്‌സ് വിഭാഗത്തില്‍ പിലിക്കോട് സ്വദേശിനി കെ അളകയ്ക്ക് രണ്ടാം റാങ്ക് ലഭിച്ചു. പിലിക്കോട് കെ.എസ്.ഇ.ബി സെക്ഷന്‍ ഓഫിസിലെ സബ് എഞ്ചിനീയര്‍ കരുണാകരന്റെയും നീലേശ്വരം ബ്ലോക്ക് പഞ്ചായത്തംഗം ശ്യാമളയുടെയും മകളാണ് അളക.

കണ്ണൂര്‍ സ്വദേശിനിയായ ശ്രുതിമോഹന്‍ മൂന്നാം റാങ്കും നേടി. മൂവരും കോളജിന്റെ ഭരണസമിതിയായ ഭക്തി സംവര്‍ധിനി യോഗത്തിന്റെ സ്വര്‍ണ മെഡലിന് അര്‍ഹരായി.