കുഡ്‌ലു ബാങ്ക് കവര്‍ച്ചക്കേസിലെ പ്രതിക്ക് കണ്ണൂര്‍ ജയിലില്‍ മര്‍ദനമെന്ന് പരാതി; മരണമൊഴിയെടുക്കണമെന്ന് ആവശ്യം

കാസര്‍കോട്: (www.kasargodvartha.com 30.05.2019) കുഡ്‌ലു ബാങ്ക് കവര്‍ച്ചക്കേസിലെ പ്രതിക്ക് കണ്ണൂര്‍ ജയിലില്‍ മര്‍ദനമെന്ന് പരാതി. തന്റെ മരണമൊഴിയെടുക്കണമെന്ന് കേസിലെ ആറാം പ്രതി എറണാകുളം പള്ളുരുത്തി സ്വദേശി ഫെനിക്സ് നെറ്റോ എന്ന ജോമോന്‍ കോടതിയില്‍ ആവശ്യപ്പെട്ടു. കണ്ണൂര്‍ സെന്‍ട്രല്‍ ജയിലില്‍ റിമാന്‍ഡില്‍ കഴിയുന്ന തനിക്ക് സഹതടവുകാരുടെ നിരന്തര മര്‍ദനം ഏല്‍ക്കേണ്ടിവരുന്നതായും ഇക്കാരണത്താല്‍ ജീവന് ഭീഷണിയുണ്ടെന്നുമാണ് കാസര്‍കോട് അഡീഷണല്‍ സെഷന്‍സ് കോടതിയില്‍ ജോമോന്‍ ഉന്നയിച്ചത്.

ഇതേ തുടര്‍ന്ന് ജയില്‍ ഐ ജിക്ക് പരാതി നല്‍കാനും നടപടിയുണ്ടായില്ലെങ്കില്‍ പരാതി പരിഗണിക്കാമെന്നും കോടതി ഇയാള്‍ക്ക് വാക്കാല്‍ ഉറപ്പുനല്‍കി. 2015 സെപ്റ്റംബറിലാണ് കുഡ്ലു ബാങ്കില്‍ പട്ടാപ്പകല്‍ കവര്‍ച്ച നടന്നത്.