പച്ചക്കറി മൊത്തവിതരണക്കാരനെ കണ്ണില്‍ മുളകുപൊടി വിതറി 3 ലക്ഷം രൂപ തട്ടിയെടുത്തതായി പരാതി

കാസര്‍കോട്: (www.kasargodvartha.com 28.05.2019) പച്ചക്കറി മൊത്തവിതരണക്കാരനെ കണ്ണില്‍ മുളകുപൊടി വിതറി മൂന്നു ലക്ഷത്തോളം രൂപ തട്ടിയെടുത്തതായി പരാതി. സംഭവത്തില്‍ കാസര്‍കോട് ടൗണ്‍ പോലീസ് കേസെടുത്ത് അന്വേഷണം ആരംഭിച്ചു. മൊഗ്രാല്‍ പുത്തൂരിലെ സതീശന്‍ (45) ആണ് അക്രമിക്കപ്പെട്ടത്. തിങ്കളാഴ്ച പുലര്‍ച്ചെ 5.30 മണിയോടെയാണ് സംഭവം. മംഗളൂരുവില്‍ നിന്ന് പച്ചക്കറിയടക്കമുള്ള സാധനങ്ങള്‍ കൊണ്ടുവന്ന് കടകളില്‍ എത്തിച്ചുകൊടുക്കുന്നയാളാണ് സതീശന്‍.

തിങ്കളാഴ്ച പുലര്‍ച്ചെ മംഗളൂരുവിലേക്ക് പോകാനായി ബസ് സ്റ്റാന്‍ഡിലേക്ക് നടന്നുപോവുന്നതിനിടെ പതിയിരുന്ന രണ്ടംഗ സംഘം ചാടിവീണ് മുളകുപൊടി മുഖത്തേക്ക് എറിയുകയും കൈവശമുണ്ടായിരുന്ന പണം കൈക്കലാക്കി രക്ഷപ്പെടുകയായിരുന്നുവെന്നും സതീശന്‍ പോലീസില്‍ നല്‍കിയ പരാതിയില്‍ പറയുന്നു.