കാസര്‍കോടിന്റെ മധുര ശബ്ദം ഉയരങ്ങള്‍ കീഴടക്കിയപ്പോള്‍
Oct 14, 2012, 08:00 IST
ഒരു കോടി വില മതിക്കുന്ന വീടും, പ്രിയദര്‍ശന്റെ ബോളിവുഡ് ചിത്രത്തില്‍ പാടാനുള്ള അവസരവും തിരുവിതാംകൂര്‍ മഹാരാജാവ് സമ്മാനിക്കുന്ന വെള്ളിതളികയില്‍ തീര്‍ത്ത രാജ മുദ്രയും സെലിന് ജോസിന് സമ്മാനമഴയായി പെയ്തിറങ്ങി. സെലിന്റെ വിജയത്തോടെ
കാസര്‍കോട്ടെ കലാസ്‌നേഹികളുടെ സ്വപ്‌നമാണ് സാക്ഷാത്ക്കരിച്ചത്. റിയാലിറ്റിഷോകളില്‍ വിരിയാത്ത കാസര്‍കോടിന്റെ മുല്ലമൊട്ട് സെലിനിലൂടെ വിടര്‍ന്നത് അക്ഷരാര്‍ത്ഥത്തില്‍ കാസര്‍കോട് ജനതയ്ക്ക് അംഗീകാരവും, അതിലുപരി അലങ്കാരവുമായി മാറി. എതിരാളികളെ പോലും അമ്പരിപ്പിക്കുന്ന മാസ്മരിക പ്രകടനമായിരുന്നു ഗ്രാന്റ് ഫിനാലെയില്‍ സെലിന് കാഴ്ച്ചവെച്ചത്. വിധികര്‍ത്താക്കള്‍ക്ക് വിമര്‍ശിക്കാന്‍ ഒരു തെല്ലും അവസരം നല്‍കാന്‍ വഴിയൊരുക്കാതെയായിരുന്നു സെലിന്റെ മുന്നേറ്റം.
പിന്നീട് അങ്ങോട്ട് ആത്മവീര്യത്തിന്റെയും, പോരാട്ടത്തിന്റെയും ഒരു ജനതയുടെ പ്രാര്‍ത്ഥനയുമാണ്‌ സെലിന്റെ ശബ്ദത്തിന് വീര്യം പകര്‍ന്നത്. രണ്ടാം റൗണ്ടിലെ സെമീക്ലാസിക്കലില്‍ 'സ്വരങ്ങള്‍ പാദസ്വരങ്ങള്‍...' എന്ന ഗാനവും. അവസാനത്തെ ഫാസ്റ്റ് റൗണ്ടില്‍ 'തുള്ളുവതോ ഇളമൈ...' എന്ന തമിഴ് ഗാനവും പാടി സെലിന് ഒന്നാം സ്ഥാനം കൈപിടിയില്‍ ഒതുക്കുകയായിരുന്നു.
കാസര്‍കോട് മൊഗ്രാല്‍ പുത്തൂര്‍ മുല്ലൂര്‍ വീട്ടില്‍ തോട്ടവിള ഗവേഷണ കേന്ദ്രത്തിലെ റിട്ട. ഓഫീസറായ ജോസഫിന്റെയും, അധ്യാപിക സാറമ്മയുടെയും മകളാണ് സെലിന്. ഇവരുടെയും ഭര്‍ത്താവ് ഷോബി സെബാസ്റ്റിയന്റെയും, രണ്ടര വയസുകാരി മകള്‍ ദിയയുടെയും ആഹ്ലാദത്തില്‍ നാട്ടുകാര്‍ മുഴുവന്‍ പങ്കാളികളായി.
സംഗീത ലോകത്തെ തന്റെ ഗുരുക്കളായ വെള്ളിക്കോത്ത് വിഷ്ണുഭട്ടിന്റെയും, ഉഷാ ഈശ്വര ഭട്ടിനെയും കുറിച്ച് പറയുമ്പോള്‍ സെലിന് കൂടുതല്‍ സന്തോഷവതിയായിരുന്നു. ചൗക്കിയിലെ സന്ദേശം ബാലജനസഖ്യത്തിലൂടെ തന്റെ കുട്ടികാലം വളര്‍ത്തിയെടുത്ത സെലിന് കേരളോത്സവങ്ങളിലും ഗാന മത്സരങ്ങളിലും തന്റെ സാന്നിദ്ധ്യം വിളിച്ചറിയിച്ചു. പ്രശസ്തികള്‍ സെലിനെ തേടിവന്നു. നിരവധി വേദികളില്‍ സെലിന് പ്രേക്ഷകരുടെ കാതോര്‍പ്പിച്ചു. സ്കൂള്‍ തലത്തില്‍ മിക്കപ്പോഴും ഒന്നാം സ്ഥാനം സ്വന്തമാക്കി. പഠനം കേന്ദ്രീയ വിദ്യാലയത്തിലായിരുന്നതിനാല്‍ സംസ്ഥാന യുവജനോത്സവങ്ങളില്‍ മാറ്റുരയ്ക്കാന്‍ സെലിന് ഭാഗ്യം ലഭിച്ചില്ല.
നീലേശ്വരത്ത് നടന്ന ഉത്തര മലബാര്‍ സംഗീത മത്സരത്തില്‍ പി. ജയചന്ദ്രന്‍ തന്നെ മികച്ച ഗായികയായി തിരഞ്ഞെടുത്തതായിരുന്നു സെലിന്റെ ജിവിതത്തിലെ മറ്റൊരു വിജയം. കവി പി.എസ്.ഹമീദാണ് സെലിനെ ഇന്ത്യന്‍ വോയിസില്‍ പാടാന്‍ അവസരം ഒരുക്കിയത്. 2005ല്‍ അദ്ദേഹം തന്നെ നിര്‍മിച്ച 'ഇമാംഹുസൈന്‍ എന്ന ആല്‍ബമാണ് സെലിന്റെ സംഗീത യുദ്ധത്തിന് തുടക്കം കുറിച്ചത്. സെലിന്റെ വിജയത്തില്‍ പി.എസ് ഹമീദും ആഹ്ലാദഭരിതനായി. വരും കാലങ്ങളില്‍ സെലിന് കൂടുതല്‍ പ്രശസ്തികള്‍ക്ക് അര്‍ഹയാകുമെന്ന് അദ്ദേഹം ആശംസകളര്‍പ്പിച്ചു.
Keywords: Selin Jose, Manorama Indian Voice, Realityshow, Winner, Article
Tags
Share this story
