എലിപ്പനി മരണം അറിയാതെ ആരോഗ്യവകുപ്പ്

കാസര്‍കോട് ജില്ലയില്‍ പകര്‍ച്ചവ്യാധികളും എലിപ്പനിയും ബാധിച്ച് മരിച്ചവരുടെ എണ്ണം ദിനം പ്രതി വര്‍ദ്ധിക്കുമ്പോഴും ആരോഗ്യവകുപ്പ് മരണത്തിന്റെ കണക്കറിയാതെ ഇരുട്ടില്‍ തപ്പുകയാണ്.
കര്‍ക്കിടക മഴയും ചിങ്ങമഴയും കനത്തപ്പോള്‍ പനിപിടിച്ച് വിറച്ച് മരിച്ചവര്‍ എത്രയാണെന്ന് ഔദ്യോഗിക കണക്കില്ല. സര്‍ക്കാര്‍ ആശുപത്രികളില്‍ മാത്രം ചികിത്സയില്‍ കഴിയുന്ന രോഗികളുടെ കണക്കൊഴിച്ചാല്‍ സ്വകാര്യ ആശുപത്രികളിലും ചികിത്സ കിട്ടാതെ വീടുകളിലും മരിച്ചവര്‍ ഒരുപാട് പേരുണ്ട്. മരിച്ചവരില്‍ അധിക പേരും കൃഷിപ്പണി, നാടന്‍പണി എന്നിവ ചെയ്ത് ഉപജീവനം നടത്തുന്നവരാണ്. ഇവരാരും ആശുപത്രികളില്‍ പോകാന്‍ തയ്യാറാകാറില്ല. പ്രതിരോധ പ്രവര്‍ത്തനങ്ങള്‍ ഊര്‍ജിതപ്പെടുത്താത്തതും, ആവശ്യത്തിനുള്ള മരുന്നുകള്‍ ലഭ്യമാക്കാത്തതുമാണ് മരണസംഖ്യ കൂടാന്‍ കാരണമായിട്ടുള്ളത്.
കഴിഞ്ഞ ദിവസം നിര്‍മാണതൊഴിലാളിയും പൂരക്കളി കലാകാരനുമായ അജാനൂര്‍ കൂലോത്ത് വളപ്പിലെ രാജേഷ്(28) എലിപ്പനി ബാധിച്ച് മരിച്ചിരുന്നു. രാജേഷിന്റെ മരണദുഖം തീരും മുമ്പാണ് ജില്ലയില്‍ എലിപ്പനി ബാധിച്ച് അടുക്കത്ത് ബയല്‍ എ.യു.പി സ്‌കൂളിലെ അധ്യാപകനും, പത്തനംതിട്ട സ്വദേശിയുമായ കെ. എം ജയിംസിന്റെ (39) മരണം. തുടര്‍ന്ന് പനി ബാധിച്ച് കഴിഞ്ഞ ദിവസം കരുവാച്ചേരി കണിയാംവയലിലെ കെ. മധുവും(38) മരിച്ചിരുന്നു. പാണത്തൂര്‍ ബാപ്പുകയത്തെ മാധവന്‍(52), പുല്ലൂര്‍ തടയത്തിലെ സ്വകാര്യ ബസ് ഡ്രൈവര്‍ നാരായണന്‍(42) എന്നിവരും എലിപ്പനി ബാധിച്ചാണ് മരിച്ചത്. രണ്ടാഴ്ച്ചയ്ക്കുള്ളില്‍ മൂന്നു യുവാക്കളുടെയും രണ്ട് മധ്യവയസ്‌കരുടേയും മരണം എലിപ്പനി ബാധിച്ചിട്ടായിരുന്നുവെന്ന് അറിഞ്ഞിട്ടുകൂടി ജില്ലാ ആരോഗ്യ വിഭാഗം ഇതിനെതിരെ ജാഗ്രത പാലിച്ചില്ലെന്ന് പരക്കെ ആക്ഷേപമുണ്ട്.