Bus Shelters | ദേശീയപാത വികസനം: പൊളിച്ചുമാറ്റിയ ബസ് കാത്തിരിപ്പ് കേന്ദ്രങ്ങൾ താത്കാലികമായി പുന:സ്ഥാപിക്കണമെന്ന ആവശ്യം ശക്തമായി; ദുരിതത്തിലായി സ്ത്രീകളും കുട്ടികളും വയോധികരും അടക്കമുള്ളവർ

കുമ്പള: (www.kasargodvartha.com) ദേശീയപാത വികസനത്തിന്റെ ഭാഗമായി പൊളിച്ചുമാറ്റിയ ബസ് കാത്തിരിപ്പ് കേന്ദ്രങ്ങൾ താത്കാലികമായി പുന:സ്ഥാപിക്കണമെന്ന ആവശ്യം ശക്തമായി. റോഡരികിലെ മരങ്ങൾ മുറിച്ചുമാറ്റുകയും കെട്ടിടങ്ങൾ പൊളിച്ച് നീക്കുകയും കൂടി ചെയ്തതോടെ പൊരിവെയിലിൽ തളരുകയാണ് സ്ത്രീകളും കുട്ടികളും അടക്കമുള്ള യാത്രക്കാർ. മുതിർന്നവരും രോഗികളായവരും പിഞ്ചു കുട്ടികളും അടക്കമുള്ളവർക്ക് ഇത് വലിയ പ്രയാസം സൃഷ്ടിക്കുന്നു.
                  
ഇനിയും എത്ര കാലം കത്തുന്ന വെയിലത്തും മഴയത്തും നിൽക്കേണ്ടി വരുമെന്നാണ് ജനങ്ങൾ ചോദിക്കുന്നത്. അതേസമയം, തലപ്പാടി - ചെങ്കള റീചിൽ ദേശീയപാത നിർമാണ കരാർ ഏറ്റെടുത്ത ഊരാളുങ്കൽ കംപനി ചില ഭാഗങ്ങളിൽ ബസ് കാത്തിരിപ്പ് കേന്ദ്രങ്ങൾ സ്ഥാപിച്ചിട്ടുണ്ട്. ഇത് ജനത്തിരക്കേറിയ എല്ലാ പ്രദേശങ്ങളിലും സ്ഥാപിക്കണമെന്നാണ് ആവശ്യം.
             
പൊളിച്ചുമാറ്റിയ ബസ് കാത്തിരിപ്പ് കേന്ദ്രങ്ങൾ എല്ലാ പ്രദേശങ്ങളിലും താൽക്കാലികമായി പുന:സ്ഥാപിക്കണമെന്ന് മൊഗ്രാൽ ദേശീയവേദി എക്സിക്യൂടീവ് യോഗം ആവശ്യപ്പെട്ടു. യോഗത്തിൽ പ്രസിഡണ്ട് എഎം സിദ്ദീഖ് റഹ്‌മാൻ അധ്യക്ഷത വഹിച്ചു. ജെനറൽ സെക്രടറി ടി കെ ജഅഫർ സ്വാഗതവും ട്രഷറർ മുഹമ്മദ് സ്മാർട് നന്ദിയും പറഞ്ഞു.