കസ്റ്റഡിയിലെടുത്ത ആഢംബര കാർ പൊലീസുകാർ വിറ്റു; 2 പേർക്ക് കൂടി സസ്‌പെൻഷൻ

നാലര ലക്ഷത്തിന്റെ നിക്ഷേപ തട്ടിപ്പ് ആരോപിച്ച് മംഗളൂരുവിലെ ഒരു സ്ത്രീ കേരളത്തിൽ ബിസിനസ് ശൃംഖലകൾ ഉള്ള ഏലിയ കൺസ്ട്രക്ഷൻ ആൻഡ് ബിൽഡേഴ്‌സ് പ്രൈവറ്റ് ലിമിറ്റഡ് കമ്പനിക്കെതിരെ പരാതി നൽകിയിരുന്നു. ഇതിന്റെ അടിസ്ഥാനത്തിൽ പ്രൊമോടർമാരെ അറസ്റ്റ് ചെയ്തിരുന്നു. ഇവരിൽ നിന്നും മൂന്ന് ആഢംബര കാറുകളും പിടിച്ചെടുത്തിരുന്നു. ബി‌എം‌ഡബ്ല്യു, പോർഷെ, ജാഗ്വാർ എന്നീ കാറുകളാണ് പിടികൂടിയത്. ജാമ്യത്തിലിറങ്ങിയ പ്രൊമോടർമാർ കാറുകൾ വിട്ട് കിട്ടാൻ സ്റ്റേഷനിൽ എത്തിയപ്പോഴാണ് കസ്റ്റഡിയിൽ രണ്ട് കാർ മാത്രം ഉള്ളതായി മനസ്സിലായത്. ഇത് വിവാദമായതിനെ തുടർന്ന് പൊലീസ് നടത്തിയ ആഭ്യന്തര അന്വേഷണത്തിലാണ് 50 ലക്ഷം രൂപ വിലവരുന്ന ജാഗ്വാർ പൊലീസുകാർ തന്നെ 14 ലക്ഷത്തിന് വിറ്റതായി കണ്ടെത്തിയത്. പൊലീസ് റിപോർടിൽ രണ്ട് കാറുകൾ മാത്രമാണ് പിടികൂടിയതായി രേഖപ്പെടുത്തിയിരുന്നത്.

സംഭവത്തിൽ അഷിത് ഡിസൂസ, രാജ, കബൽരാജ്, രാമകൃഷ്ണൻ എന്നീ പോലീസുകാരെയാണ് സസ്‌പെൻഡ് ചെയ്തത്. ബെംഗളൂരു ആസ്ഥാനമായുള്ള വ്യവസായി ഭൂപേന്ദ്ര സിംഗിന് കാർ വിൽക്കാൻ സഹായിച്ചതായി പിടിയിലായ ഇടനിലക്കാരൻ അന്വേഷണ ഉദ്യോഗസ്ഥരോട് വെളിപ്പെടുത്തിയിട്ടുണ്ട്. പോർഷെ വിൽക്കാൻ പദ്ധതിയിട്ടിരുന്നതായും ഉദ്യോഗസ്ഥർ പറഞ്ഞു. കേസ് വിശദമായി അന്വേഷിക്കാൻ സിഐഡി ഉദ്യോഗസ്ഥർ തീരുമാനിച്ചിട്ടുണ്ട്.