റേഷൻ അരി തൂക്കത്തിലെ ക്രമക്കേട് ചോദ്യം ചെയ്ത വിദ്വേഷത്തിൽ വീട്ടമ്മയെ ആക്രമിച്ചതായും നിർമാണം നടക്കുന്ന വീടിന്റെ കട്ടിള ഇളക്കിമാറ്റിയതായും പരാതി

നീലേശ്വരം: (www.kasargodvartha.com 14.10.2020) റേഷൻ അരി തൂക്കത്തിൽ ക്രമക്കേട് കാണിച്ചത് ചോദ്യം ചെയ്ത വിദ്വേഷത്തിൽ വീട്ടമ്മയെ മർദിച്ചതായും നിർമാണം നടക്കുന്ന വീടിന്റെ കട്ടിള ഇളക്കിമാറ്റിയതായും പരാതി. ബങ്കളം എസ് എസ് ക്വാർട്ടേഴ്സിലെ സി രമണിയാണ് ജില്ലാ കലക്ടർ ഡോ. ഡി സജിത് ബാബുവിനു പരാതി നൽകിയത്.

സെപ്റ്റംബർ 25 ന് ബങ്കളത്തെ റേഷൻ കടയിൽ അരി വാങ്ങാൻ പോയപ്പോൾ അരിയുടെ അളവ് കുറച്ച് നൽകിയത് ചോദ്യം ചെയ്തതിന് പിടിച്ചു തള്ളിയതായും അവിടെയുണ്ടായിരുന്ന രണ്ട് സ്ത്രീകളും സിപിഎം നേതാവും സോഡാക്കുപ്പി കൊണ്ടടിച്ചതായുമാണ് പരാതി. ഇതേ തുടർന്ന് പരിക്കേറ്റ ഇവർ നീലേശ്വരം താലൂക്ക് ആശുപത്രിയിൽ ചികിത്സ തേടിയതായും പറയുന്നു.