പൗരത്വ ഭേദഗതി നിയമം വിശദീകരിക്കാനെത്തിയ ബി ജെ പി പ്രവര്‍ത്തകരെ നാട്ടുകാരും വ്യാപാരികളും ബഹിഷ്‌കരിച്ചു; ജനജാഗ്രതാ സദസ് തുടങ്ങുന്നതിന് മുമ്പ് വ്യാപാരികള്‍ മുഴുവന്‍ കടകളച്ചു, പ്രദേശത്തെ ഒറ്റ ആളുപോലും വീടിന് പുറത്തിറങ്ങിയില്ല

Whatsapp Group Whatsapp Channel

By Web Desk - MainJan 12, 2020, 10:39 IST

ആലപ്പുഴ: (www.kasargodvartha.com 12.01.2020) പൗരത്വ ഭേദഗതി നിയമം വിശദീകരിക്കാനെത്തിയ ബി ജെ പി പ്രവര്‍ത്തകരെ നാട്ടുകാരും വ്യാപാരികളും ബഹിഷ്‌കരിച്ചു. ജനജാഗ്രതാ സദസ് തുടങ്ങുന്നതിന് മുമ്പ് വ്യാപാരികള്‍ മുഴുവന്‍ കടകളച്ച് പോവുകയും പ്രദേശത്തെ ആളുകള്‍ വീടിന് പുറത്തിറങ്ങാതിരിക്കുകയും ചെയ്തു. ഇതോടെ പുറത്തുനിന്നുമെത്തിയ ബി ജെ പി പ്രവര്‍ത്തകര്‍ക്കു മുന്നില്‍ പൗരത്വ ഭേദഗതി നിയമത്തെ കുറിച്ച് വിശദീകരിച്ച് നേതാക്കള്‍ സ്ഥലംവിട്ടു.

അമ്പലപ്പുഴ വളഞ്ഞവഴിയിലാണ് സംഭവം. ഉദ്ഘാടകനായി എത്തിയ ബി ജെ പി സംസ്ഥാന ജനറല്‍ സെക്രട്ടറി എം ടി രമേശിന് മുന്നില്‍ വിശദീകരണം കേള്‍ക്കാന്‍ സ്ഥലത്തിന് പുറത്ത് നിന്നെത്തിയ ബി ജെ പിക്കാര്‍ മാത്രമേ ഉണ്ടായിരുന്നുള്ളൂ. അമ്പലപ്പുഴയിലെ മുസ്ലിം ഭൂരിപക്ഷ പ്രദേശമായ വളഞ്ഞവഴിയില്‍ ബി ജെ പി മണ്ഡലം കമ്മിറ്റിയാണ് ജനജാഗ്രതാ സദസ് സംഘടിപ്പിച്ചത്. പൗരത്വ ഭേദഗതി നിയമം വിശദീകരിച്ചു നല്‍കാന്‍ വലിയ പ്രചാരണമൊക്കെ നടത്തിയെങ്കിലും പരിപാടി തുടങ്ങുന്നതിന് മുമ്പേ നാട്ടുകാര്‍ ഉപേക്ഷിക്കുകയായിരുന്നു.

ബി ജെ പിക്കാര്‍ കസേര അടുക്കി തുടങ്ങിയപ്പോള്‍ തന്നെ സ്ഥലത്തെ വ്യാപാരികള്‍ കടകള്‍ക്ക് ഷട്ടറിട്ട് സ്ഥലംവിട്ടു. പ്രദേശത്തെ ഒറ്റ ആളുപോലും വീടിന് പുറത്തിറങ്ങിയില്ല. ഇതോടെ സ്ഥലത്ത് ഹര്‍ത്താല്‍ പ്രതീതിയായിരുന്നു.