ചന്ദ്രഗിരിപ്പുഴയിലേക്ക് മാലിന്യം വലിച്ചെറിഞ്ഞ കാര്‍ യാത്രക്കാരനെതിരെ പോലീസ് കേസെടുത്തു

കാസര്‍കോട്: (www.kasargodvartha.com 19.08.2019) ചന്ദ്രഗിരിപ്പുഴയിലേക്ക് മാലിന്യം വലിച്ചെറിഞ്ഞ കാര്‍ യാത്രക്കാരനെതിരെ പോലീസ് കേസെടുത്തു. ചെമ്മനാട് വടക്കുംഭാഗത്ത് താമസിക്കുന്ന അഷ്‌റഫിനെതിരെ (50)യാണ് കാസര്‍കോട് ടൗണ്‍ പോലീസ് കേസെടുത്തത്. ഐ പി സി സെക്ഷന്‍ 269, കെ പി എ ആക്ട് 120 (ഇ) എന്നീ വകുപ്പുകളിലായാണ് കേസെടുത്തിരിക്കുന്നത്. സാമൂഹ്യ പ്രവര്‍ത്തകനായ കീഴൂരിലെ കെ എസ് സാലിയാണ് മാലിന്യം തള്ളിയതു സംബന്ധിച്ച് പോലീസില്‍ പരാതി നല്‍കിയത്.


ഇക്കഴിഞ്ഞ 16ന് രാവിലെ 10 മണിക്കാണ് കെ എല്‍ 14 ആര്‍ 3904 നമ്പര്‍ കാറിലെത്തി പാലത്തില്‍ നിന്നും മാലിന്യം ചന്ദ്രഗിരിപ്പുഴയിലേക്ക് വലിച്ചെറിഞ്ഞത്. ഇതിന്റെ ദൃശ്യം സോഷ്യല്‍ മീഡിയയില്‍ വൈറലായിരുന്നു. ഇതിനു പിന്നാലെയാണ് കെ എസ് സാലി ജില്ലാ കലക്ടര്‍ക്ക് പരാതി നല്‍കിയത്. കലക്ടര്‍ പോലീസിന് പരാതി നല്‍കാന്‍ അറിയിക്കുകയും കേസെടുക്കാന്‍ നിര്‍ദേശിക്കുകയുമായിരുന്നു.

കാസര്‍കോട് സി ഐ മധുസൂദനന്റെയും എസ് ഐ മെല്‍വിന്‍ ജോസിന്റെയും അന്വേഷണത്തിലാണ് മാലിന്യം തള്ളിയയാളെ കുറിച്ച് വിവരം ലഭിച്ചത്. ഇത്തരത്തില്‍ ജില്ലയിലുടനീളം പുഴയില്‍ മാലിന്യം തള്ളുന്നതായുള്ള പരാതികള്‍ വ്യാപകമാകുമ്പോഴാണ് പട്ടാപ്പകല്‍ മാലിന്യം തള്ളുന്ന വീഡിയോ പുറത്തുവന്നത്.

Related News:
പട്ടാപ്പകലും മാലിന്യങ്ങള്‍ പുഴയിലേക്ക്; എന്ന് തീരും ചന്ദ്രഗിരിയുടെ ഈ ദുരവസ്ഥ?, മാലിന്യം തള്ളുന്നവര്‍ക്കെതിരെ നടപടിയെടുക്കണമെന്ന ആവശ്യം ശക്തം