ശക്തമായ മഴയ്ക്ക് സാധ്യത; കാസര്‍കോട് ജില്ലയില്‍ തിങ്കളാഴ്ച ഓറഞ്ച് അലേര്‍ട്ടും ചൊവാഴ്ച റെഡ് അലേര്‍ട്ടും പ്രഖ്യാപിച്ചു

കാസര്‍കോട്: (www.kasargodvartha.com 21.07.2019) ശക്തമായ മഴ തുടരുന്ന സാഹചര്യത്തില്‍ കാസര്‍കോട് ജില്ലയില്‍ ജൂലൈ 22 ന് തിങ്കളാഴ്ച ഓറഞ്ച് അലേര്‍ട്ടും ജൂലൈ 23ന് ചൊവ്വാഴ്ച റെഡ് അലേര്‍ട്ടും പ്രഖ്യാപിച്ചു. 24ന് ഓറഞ്ച് അലേര്‍ട്ടാണ് പ്രഖ്യാപിച്ചിട്ടുണ്ട്. 25 വരെയുള്ള കാലവസ്ഥ മുന്നറിയിപ്പില്‍ കാസര്‍കോട്, കണ്ണൂര്‍ ജില്ലകളില്‍ 23നും, കണ്ണൂര്‍, കോഴിക്കോട്, വയനാട് ജില്ലകളില്‍ 22നും കേന്ദ്ര കാലാവസ്ഥ നിരീക്ഷണ കേന്ദ്രം റെഡ് അലേര്‍ട്ട് പ്രഖ്യാപിച്ചിട്ടുണ്ട്.

റെഡ് പ്രഖ്യാപിക്കപ്പെട്ട ജില്ലകളില്‍ അതിതീവ്ര (24 മണിക്കൂറില്‍ 204 മില്ലിമീറ്ററില്‍ കൂടുതല്‍ മഴ) മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. സര്‍ക്കാര്‍ സംവിധാനങ്ങളും പൊതുജനങ്ങളും ജാഗ്രത പാലിക്കുവാനും ക്യാമ്പുകള്‍ തയ്യാറാക്കുകയുള്‍പ്പെടെയുള്ള മുന്നൊരുക്കങ്ങള്‍ നടത്തുക എന്നതുമാണ് റെഡ് അലേര്‍ട്ട് കൊണ്ട് ഉദ്ദേശിക്കുന്നത്. തുടര്‍ച്ചയായ ദിവസങ്ങളില്‍ അതിതീവ്ര മഴ പെയ്യുന്ന സാഹചര്യത്തില്‍ വെള്ളപ്പൊക്കം, ഉരുള്‍പൊട്ടല്‍ തുടങ്ങിയ പ്രകൃതി ദുരന്തങ്ങള്‍ക്ക് സാധ്യത വര്‍ധിക്കും.