പുഴയില്‍ ഒഴുകിയെത്തിയ മരം മുറിച്ചുകടത്താന്‍ ശ്രമം; വനം വകുപ്പ് പിടികൂടി കേസെടുത്തു

മുള്ളേരിയ: (www.kasargodvartha.com 15.06.2019) പുഴയില്‍ ഒഴുകിയെത്തിയ മരം മുറിച്ചുകടത്താന്‍ ശ്രമിച്ചതിന് വനം വകുപ്പ് കേസെടുത്തു. പയസ്വിനിപ്പുഴയിലെ മഞ്ഞംപാറ മൂലയില്‍ നിന്നു കടത്താന്‍ ശ്രമിച്ച കുറ്റന്‍ ഉരുപ്പുമരമാണ് പിടികൂടിയത്. 10 തടിക്കഷണങ്ങളാണ് കടത്താന്‍ ശ്രമിച്ചത്. വര്‍ഷങ്ങള്‍ക്ക് മുമ്പ് പുഴയിലൂടെ ഒഴുകിയെത്തിയ മരം മണല്‍ മൂടിക്കിടക്കുകയായിരുന്നു. വെള്ളം വറ്റിയതോടെയാണ് ഇത് മുറിച്ചുകടത്താന്‍ ശ്രമിച്ചത്. പ്രതികള്‍ക്കു വേണ്ടിയുള്ള അന്വേഷണം ആരംഭിച്ചിട്ടുണ്ട്.

സെക്ഷന്‍ ഫോറസ്റ്റ് ഓഫീസര്‍ ആര്‍ ബാബു, ബീറ്റ് ഓഫീസര്‍ എ എ ഖമറുന്നീസ, വാച്ചര്‍ എം സുധാകര എന്നിവരുടെ നേതൃത്വത്തിലാണ് മരം മുറിച്ചുകടത്താന്‍ ശ്രമിച്ചത് പിടികൂടിയത്. മരത്തിന് വിപണിയില്‍ 25,000 രൂപ വില വരുമെന്ന് അധികൃതര്‍ വ്യക്തമാക്കി. പുഴയില്‍ ഒഴുകിയെത്തുന്ന തടി ലഭിക്കുന്നിടത്ത് തന്നെയിടണമെന്നും കൊണ്ടുപോകാന്‍ പാടില്ലെന്നുമാണ് ചട്ടം.