കാസര്‍കോട്ട് ചുവപ്പന്‍ കോട്ടകളില്‍ എല്‍ ഡി എഫിന് അടിപതറി; വോട്ട് ചോര്‍ച്ച അപ്രതീക്ഷിത തോല്‍വിക്ക് കാരണമായി

കാസര്‍കോട്: (www.kasargodvartha.com 23.05.2019) കാസര്‍കോട്ട് ചുവപ്പന്‍ കോട്ടകളില്‍ എല്‍ ഡി എഫിന് അടിപതറി. വോട്ട് ചോര്‍ച്ച അപ്രതീക്ഷിത തോല്‍വിക്ക് കാരണമായതായി നേതാക്കള്‍ രഹസ്യമായി സമ്മതിക്കുന്നു. ചുവന്ന കോട്ടയായി അറിയപ്പെടുന്ന കല്യാശേരിയിലും പയ്യന്നൂരിലും തൃക്കരിപ്പൂരിലും പ്രതീക്ഷിച്ച വോട്ട് എല്‍ ഡി എഫ് സ്ഥാനാര്‍ത്ഥിക്ക് ലഭിച്ചില്ല. കൂടിയ വോട്ടില്‍ യു ഡി എഫ് വലിയ രീതിയില്‍ മുന്നേറ്റം നടത്തിയപ്പോള്‍ എല്‍ ഡി എഫിന് പ്രതീക്ഷിച്ച വോട്ട് കിട്ടിയില്ല.

കല്യാശേരിയില്‍ കഴിഞ്ഞ പാര്‍ലമെന്റ് തിരഞ്ഞെടുപ്പിനേക്കാള്‍ 2,337 വോട്ടുകള്‍ എല്‍ ഡി എഫിന് അധികം ലഭിച്ചു. അതേസമയം 11,425 വോട്ടുകളാണ് കല്യാശേരിയില്‍ കഴിഞ്ഞ തവണത്തേക്കാള്‍ ഉണ്ണിത്താന് ലഭിച്ചത്. തൃക്കരിപ്പൂര്‍, പയ്യന്നൂര്‍ എന്നിവിടങ്ങളില്‍ യഥാക്രമം 10951, 7694 വോട്ടുകള്‍ എല്‍ ഡി എഫിന് വര്‍ദ്ധിച്ചപ്പോള്‍ യു ഡി എഫിന് 12503, 9705 വോട്ടുകള്‍ ലഭിച്ചു. ഇടത് കോട്ടകളില്‍ വോട്ടില്‍ വന്ന കുറവാണ് എല്‍ ഡി എഫിന് കനത്ത പരാജയത്തിന് കാരണമായത്. 40438 വോട്ടിന്റെ ഭൂരിപക്ഷത്തിനാണ് കാസര്‍കോട്ട് ഉണ്ണിത്താന്‍ വിജയിച്ചത്.