മംഗളൂരുവില്‍ ഡെങ്കിപ്പനി പടരുന്നു: പനിബാധിച്ച മാധ്യമപ്രവര്‍ത്തകന്‍ മരണത്തിന് കീഴടങ്ങി

മംഗളൂരു: (www.kasargodvartha.com 22.07.2019) മംഗളൂരു നഗരത്തില്‍ ഡെങ്കിപ്പനി പടരുന്നു. പനിബാധിച്ച് ചികിത്സയിലായിരുന്ന മാധ്യമപ്രവര്‍ത്തകന്‍ മരണത്തിന് കീഴടങ്ങി. ബി ടി വി ചാനലില്‍ ജോലി ചെയ്യുന്ന വീഡിയോ ജേണലിസ്റ്റ് നാഗേഷ് പാദു (32) ആണ് മരണപ്പെട്ടത്. ഒരാഴ്ച മുമ്പാണ് നാഗേഷിന് ഡെങ്കിപ്പനി ബാധിച്ചതായി കണ്ടെത്തിയത്. മംഗളൂരു കെ എം സി ആശുപത്രിയില്‍ ചികിത്സയിലായിരുന്നു.

രോഗം മൂര്‍ച്ഛിച്ചതിനാല്‍ മരുന്നിനോട് പ്രതികരിക്കുന്നതില്‍ പരാജയപ്പെട്ട് ഗുരുതരാവസ്ഥയിലായിരുന്നു. ഞായറാഴ്ച വൈകിട്ടോടെയാണ് മരണപ്പെട്ടത്. ദക്ഷിണ കന്നഡ ജില്ലയില്‍ കഴിഞ്ഞദിവസങ്ങളില്‍ 24 പേരെ കടുത്ത പനി ബാധിച്ച് ആശുപത്രികളില്‍ പ്രവേശിപ്പിച്ചിരുന്നു. ഇതില്‍ 22 പേര്‍ക്ക് ഡെങ്കിപ്പനി ബാധിച്ചതായി കണ്ടെത്തിയിട്ടുണ്ട്. അതേസമയം ആരോഗ്യവകുപ്പ് ഉദ്യോഗസ്ഥരുടെ വിവരമനുസരിച്ച് മംഗളൂരുവില്‍ ഡെങ്കിപ്പനി ബാധിച്ചവരുടെ എണ്ണം ഇപ്പോള്‍ 426 ആയി ഉയര്‍ന്നു.