അല്‍ത്വാഫിന്റെ കൊല: മരുമകനടക്കം 5 പേര്‍ക്കെതിരെ കൊലക്കുറ്റം ചുമത്തി, പ്രതികള്‍ ഒളിവില്‍, കാറുകള്‍ കണ്ടെത്താനായില്ല

കുമ്പള: (www.kasargodvartha.com 25.06.2019) കുമ്പള ബേക്കൂര്‍ ശാന്തിഗുരി സ്വദേശിയായ അല്‍ത്വാഫിന്റെ (48) കൊലപാതകവുമായി ബന്ധപ്പെട്ട് മരുമകന്‍ ബന്തിയോട് കുക്കാറിലെ ഷബീര്‍ മൊയ്തീനും സുഹൃത്തുക്കളായ നാലു പേര്‍ക്കുമെതിരെ കുമ്പള പോലീസ് കൊലക്കുറ്റം ചുമത്തി. നേരത്തെ അല്‍ത്വാഫിനെ തട്ടിക്കൊണ്ടുപോയതിന് ഭാര്യ ഫാത്വിമയുടെ പരാതിയില്‍ കേസെടുത്തിരുന്നു. ഈ കേസിലാണ് കൊലക്കുറ്റം ചുമത്തി പ്രതികള്‍ക്കെതിരെ കര്‍ശന വകുപ്പുകള്‍ കൂട്ടിച്ചേര്‍ത്തിരിക്കുന്നത്.

പ്രതികളെ കണ്ടെത്താന്‍ കുമ്പള സി ഐ രാജീവന്‍ വലിയവളപ്പിന്റെ നേതൃത്വത്തില്‍ അന്വേഷണം ഉൗര്‍ജിതമാക്കിയിട്ടുണ്ട്. പ്രതികളെ തേടി ഒരു സംഘം കര്‍ണാടകയിലേക്കും പോയിട്ടുണ്ട്. അതേസമയം തട്ടിക്കൊണ്ടുപോകാനുപയോഗിച്ച ബലേനോ, സ്വിഫ്റ്റ് കാറുകള്‍ കണ്ടെത്താനായിട്ടില്ല. ഈ കാറുകള്‍ കണ്ടെത്താനും അന്വേഷണം ഊര്‍ജിതമാക്കിയിട്ടുണ്ട്.

മകള്‍ സറീനയെ പീഡിപ്പിക്കുന്നതിന്റെ പേരില്‍ വീട്ടിലേക്ക് കൂട്ടിക്കൊണ്ടുപോയതിന്റെ വൈരാഗ്യത്തിലാണ് അല്‍ത്താഫിനെ തട്ടിക്കൊണ്ടുപോയി കൊലപ്പെടുത്തിയത്.