വരും തെരഞ്ഞെടുപ്പ് ഹരിതചട്ടം പാലിച്ച്; പ്ലാസ്റ്റിക് ഫ്‌ളക്‌സുകളില്ല, ഡിസ്പോസിബിള്‍ വസ്തുക്കളുമില്ല, അലങ്കാരങ്ങള്‍ക്കും തോരണങ്ങള്‍ക്കും പ്രകൃതി സൗഹൃദ വസ്തുക്കള്‍

കാസര്‍കോട്: (www.kasargodvartha.com 14.03.2019) ജില്ലാ കളക്ടറുടെ അധ്യക്ഷതയില്‍ നടന്ന രാഷ്ട്രീയ പാര്‍ട്ടി പ്രതിനിധികളുടെയും ഉദ്യോഗസ്ഥരുടെയും യോഗത്തില്‍ ലോക്സഭ തെരെഞ്ഞെടുപ്പില്‍ പൂര്‍ണമായും ഹരിതചട്ടം പാലിക്കാന്‍ തീരുമാനിച്ചു. ഹൈക്കോടതി വിധിയുടെ പശ്ചാത്തലത്തില്‍ ഫ്ളക്സ് ബോര്‍ഡുകള്‍ക്ക് നേരത്തെ തന്നെ നിരോധനം ഏര്‍പ്പെടുത്തിയിട്ടുണ്ട്. ഇതോടൊപ്പം ജില്ലയിലെ പോളിംഗ് ബൂത്തുകളില്‍ അടക്കം ഹരിതചട്ടം പാലിക്കും.

കുടിവെളള കിയോസ്‌കുകള്‍, തുണി ബാനര്‍, പേപ്പര്‍ പോസ്റ്റര്‍, പേപ്പര്‍ പേന, പെന്‍സില്‍, പേപ്പര്‍ ഐഡി കാര്‍ഡുകള്‍ തുടങ്ങിയ പ്രകൃതി സൗഹൃദ മാര്‍ഗ്ഗങ്ങള്‍ സ്വീകരിക്കും. ഡിസ്പോസിബിള്‍ വസ്തുക്കള്‍ പൂര്‍ണ്ണമായി ഒഴിവാക്കി ഭക്ഷണത്തിന് വാഴയിലയും കഴുകി ഉപയോഗിക്കാവുന്ന സ്റ്റീല്‍ പാത്രങ്ങളും ഗ്ലാസ്സുകളും ഉപയോഗിക്കാം. പ്രചാരണത്തിന്റെ ഭാഗമായി അലങ്കാരങ്ങള്‍ക്കും തോരണങ്ങള്‍ക്കും പ്രകൃതി സൗഹൃദ വസ്തുക്കള്‍ ഉപയോഗിക്കാനും തീരുമാനിച്ചു.