വാഹനങ്ങള്‍ കൊണ്ട് വീര്‍പ്പുമുട്ടി മിനി സിവില്‍ സ്റ്റേഷന്‍

കാഞ്ഞങ്ങാട്: (www.kasargodvartha.com 12.02.2019) പുതിയകോട്ടയിലെ മിനി സിവില്‍ സ്റ്റേഷന്‍ കോമ്പൗണ്ടില്‍ പഴയ താലൂക്ക് ഓഫീസിന് മുന്നില്‍ കൂട്ടിയിട്ട വാഹനങ്ങള്‍ ജനങ്ങള്‍ക്ക് ദുരിതമാകുന്നു. മണല്‍, പൂഴി, ചെങ്കല്ല് തുടങ്ങിയവ അനധികൃതമായി കടത്തിക്കൊണ്ടുപോകുന്നതിനിടയില്‍ റവന്യൂ അധികൃതര്‍ പിടികൂടിയ ടിപ്പര്‍ ലോറികള്‍, ലോറികള്‍, ടെമ്പോ, മണ്ണെടുക്കാനുപയോഗിച്ച ജെസിബികള്‍ തുടങ്ങിയ നിരവധി വാഹനങ്ങളാണ് മിനി സിവില്‍ സ്റ്റേഷന്‍ കോമ്പൗണ്ടിലും തൊട്ടടുത്തുള്ള രജിസ്ട്രേഷന്‍ ഓഫീസിന് മുന്നിലും മാര്‍ഗതടസം സൃഷ്ടിച്ചുകൊണ്ട് കൂട്ടിയിട്ടിരിക്കുന്നത്.

ഇങ്ങനെ പിടികൂടുന്ന വാഹനങ്ങളെക്കുറിച്ച് തഹസില്‍ദാര്‍ റിപ്പോര്‍ട്ട് തയ്യാറാക്കി ആര്‍ഡിഒവിനും ആര്‍ഡിഒ ഇതുപരിശോധിച്ച് കളക്ട്രേറ്റിലും, കളക്ട്രേറ്റില്‍ നിന്ന് മൈനിംഗ് ആന്‍ഡ് ജിയോളജി വകുപ്പിനും റിപ്പോര്‍ട്ട് കൈമാറും. ഈ റിപ്പോര്‍ട്ടിന്റെ അടിസ്ഥാനത്തില്‍ ജിയോളജി വകുപ്പ് വിധിക്കുന്ന പിഴ റവന്യൂ വകുപ്പില്‍ അടച്ചുകഴിഞ്ഞാലേ വാഹനങ്ങള്‍ വിട്ടുകൊടുക്കുകയുള്ളൂ. ഇതിനുള്ള നടപടിക്രമങ്ങള്‍ സര്‍ക്കാര്‍ മുറപോലെ മാസങ്ങള്‍ വൈകുന്നതാണ് വാഹനങ്ങള്‍ വിട്ടുകൊടുക്കാനാവാതെ മിനി സിവില്‍സ്റ്റേഷനില്‍ കെട്ടിക്കിടക്കുന്നത്.

ഈ വാഹനങ്ങള്‍ തലങ്ങും വിലങ്ങും നിര്‍ത്തിയിട്ടുള്ളതിനാല്‍ ഓഫീസില്‍ വിവിധ ആവശ്യങ്ങള്‍ക്കെത്തുന്ന ജനങ്ങള്‍ക്കും ഉദ്യോഗസ്ഥര്‍ക്കും അവരുടെ വാഹനങ്ങള്‍ പാര്‍ക്കുചെയ്യാന്‍ സ്ഥലമില്ലാതെ ബുദ്ധിമുട്ട് അനുഭവിക്കേണ്ടിയും വരുന്നു. ഇതൊഴിവാക്കാന്‍ ഇങ്ങനെ പിടികൂടുന്ന വാഹനങ്ങളെ എത്രയും വേഗത്തില്‍ നടപടി ക്രമങ്ങള്‍ പൂര്‍ത്തീകരിച്ച് ഉടമകള്‍ക്ക് വിട്ടുകൊടുക്കാനുള്ള സംവിധാനമുണ്ടാക്കണമെന്നാണ് നാട്ടുകാര്‍ ആവശ്യപ്പെടുന്നത്.