വീടിന്റെ പിറകുവശത്തെ ഗ്രില്‍സ് തകര്‍ത്ത് അകത്തുകടന്ന മോഷ്ടാവ് അലമാരയില്‍ സൂക്ഷിച്ചിരുന്ന പണവും രേഖകളുമടങ്ങിയ ബാഗുമായി കടന്നുകളഞ്ഞു; ഉറങ്ങിക്കിടക്കുകയായിരുന്ന കുട്ടികള്‍ ഉണര്‍ന്നതിനാല്‍ സ്വര്‍ണം നഷ്ടപ്പെട്ടില്ല, പോലീസ് സ്ഥലത്തെത്തി അന്വേഷണം ആരംഭിച്ചു

തളങ്കര: (www.kasargodvartha.com 08.02.2019) വീടിന്റെ പിറകുവശത്തെ ഗ്രില്‍സ് തകര്‍ത്ത് അകത്തുകടന്ന മോഷ്ടാവ് അലമാരയില്‍ സൂക്ഷിച്ചിരുന്ന പണവും രേഖകളുമടങ്ങിയ ബാഗുമായി കടന്നുകളഞ്ഞു. ഉറങ്ങിക്കിടക്കുകയായിരുന്ന കുട്ടികള്‍ ഉണര്‍ന്നതിനാല്‍ സ്വര്‍ണം നഷ്ടപ്പെട്ടില്ല. വിവരമറിഞ്ഞ് പോലീസ് സ്ഥലത്തെത്തി അന്വേഷണം ആരംഭിച്ചു. തെരുവത്ത് ഹൊന്നമൂലയിലെ അബ്ദുല്‍ ഖാദറിന്റെ വീട്ടിലാണ് കവര്‍ച്ച നടന്നത്.

വെള്ളിയാഴ്ച പുലര്‍ച്ചെയാണ് സംഭവം. വീടിന്റെ പിറകുവശത്തെ ഗ്രില്‍സ് തകര്‍ത്ത് അകത്തു കടന്ന മോഷ്ടാവ് അടുക്കളയിലെ വാതില്‍ തകര്‍ത്താണ് അകത്തു കടന്നത്. തുടര്‍ന്ന് കുട്ടികള്‍ കിടക്കുന്ന മുറിയിലെത്തിയ മോഷ്ടാവ് അലമാരയില്‍ നിന്നും സ്വര്‍ണവും പണവും അപഹരിക്കുന്നതിനിടെ കുട്ടികള്‍ ഉണര്‍ന്നു. ഇതോടെ മോഷ്ടാവ് സ്വര്‍ണം ഉപേക്ഷിച്ച് പണവും പാസ്‌പോര്‍ട്ട് അടക്കമുള്ള വിലപിടിപ്പുള്ള രേഖകള്‍ സൂക്ഷിച്ചിരുന്ന പഴ്‌സുമായി കടന്നുകളയുകയായിരുന്നു. മോഷ്ടാവ് ഉപയോഗിച്ച കമ്പിപ്പാര സ്ഥലത്തു നിന്നും കണ്ടെത്തി.

വിവരമറിയിച്ചതിന്റെ അടിസ്ഥാനത്തില്‍ കാസര്‍കോട് ടൗണ്‍ പോലീസ് സ്ഥലത്തെത്തി പരിശോധന നടത്തി. സംഭവത്തില്‍ ഊര്‍ജിതമായ അന്വേഷണം ആരംഭിച്ചതായി പോലീസ് അറിയിച്ചു. അതേസയം പ്രദേശത്തെ മറ്റൊരു വീട്ടിലും കവര്‍ച്ചാ ശ്രമം നടന്നിട്ടുണ്ട്. ഈ വീട്ടിലെ വാതില്‍ തുറക്കാന്‍ സാധിക്കാത്തതിനാല്‍ മോഷ്ടാവ് ശ്രമം ഉപേക്ഷിക്കുകയായിരുന്നു.