പെരിയയില്‍ സി പി എം നിയന്ത്രണത്തിലുള്ള ക്ലബുകള്‍ക്കും കടക്കും നേരെ തീവെപ്പും അക്രമവും

പെരിയ: (www.kasargodvartha.com 18.02.2019) കൊലപാതകത്തെതുടര്‍ന്ന് ഞായറാഴ്ച രാത്രിയും തിങ്കളാഴ് വൈകുന്നേരവുമായി കല്യോട്ട് ടൗണില്‍ സി പി എം നിയന്ത്രണത്തിലുള്ള ക്ലബിനും സി പി എം പ്രവര്‍ത്തകരുടെ കടകള്‍ക്കും നേരെ വ്യാപക അക്രമം. ഞായറാഴ്ച രാത്രി എ കെ ജി ക്ലബിന്റെ വാതില്‍ തകര്‍ത്ത് അകത്തുകയറി മേശകളും കസേരകളും തീയിട്ടു നശിപ്പിച്ചു. ക്ലബിന്റെ കതകുകളും ഫാനുകളും വയറിംഗും പൂര്‍ണമായി കത്തിനശിച്ചനിലയിലാണ്.

തിങ്കളാഴ്ച വൈകുന്നേരത്തോടെ വീണ്ടും ഈ കെട്ടിടത്തിനു തീയിട്ടു. കല്യോട്ടെ വത്സരാജന്റെ പലചരക്കുകടയും തീവെച്ചുനശിപ്പിച്ചിട്ടുണ്ട്. വത്സരാജന്റെ സഹോദരന്‍ ജയരാജന്റെ ഉടമസ്ഥതയിലുള്ള ഗ്ലോബല്‍ കോള്‍ഡ് ഹൗസ് എന്ന കൂള്‍ബാര്‍ ഞായറാഴ്ച രാത്രി പൂര്‍ണമായും അടിച്ചുതകര്‍ത്തിരുന്നു. ഷട്ടര്‍ തകര്‍ത്ത് അകത്തുകടന്ന സംഘം അതിനുള്ളിലെ ഫ്രീസറും വെയിംഗ് മെഷീനും ട്രേകളും സോഡാകുപ്പികളും പഴവര്‍ഗങ്ങളും പുറത്തേയ്‌ക്കെറിഞ്ഞുടച്ചു. ഇവിടെ നിന്നെടുത്ത സോഡാകുപ്പികള്‍ മെയിന്‍ റോഡില്‍ എറിഞ്ഞുടച്ചതോടെ റോഡ് മുഴുവന്‍ കുപ്പിച്ചില്ലുകള്‍ കൊണ്ട് നിറഞ്ഞു.