കാറപകടത്തില്‍ പരിക്കേറ്റ ഹനാന്‍ സുഖം പ്രാപിക്കുന്നു

കൊച്ചി: (www.kasargodvartha.com 04.09.2018) കാറപകടത്തില്‍ പരിക്കേറ്റ ഹനാന്‍ സുഖം പ്രാപിക്കുന്നു. ശസ്ത്രക്രിയയ്ക്കു ശേഷം മൂത്രതടസ്സം, കാലുകള്‍ക്ക് മരവിപ്പ് എന്നിവയുള്ളതിനാല്‍ ഏതാനും ദിവസം ഐസിയുവില്‍ തന്നെ പ്രവേശിപ്പിക്കുമെന്നാണ് അറിയുന്നത്. തിങ്കളാഴ്ച പുലര്‍ച്ചെ കൊടുങ്ങല്ലൂരില്‍ വെച്ചാണ് ഹനാന്‍ സഞ്ചരിച്ച കാര്‍ അപകടത്തില്‍പെട്ടത്.

നട്ടെല്ലിന്റെ 12-ാം കശേരുവില്‍ സാരമായ പൊട്ടലുണ്ടെന്ന് കണ്ടെത്തിയതിനെത്തുടര്‍ന്നാണ് അടിയന്തരശസ്ത്രക്രിയ നടത്തിയത്. ന്യൂറോ സര്‍ജന്‍ ഡോ. ഹാരൂണ്‍ എം പിള്ളയാണ് ശസ്ത്രക്രിയയ്ക്ക് നേതൃത്വം നല്‍കിയത്. ഒടിഞ്ഞ നട്ടെല്ലിന്റെ ഭാഗം മൂന്നു മണിക്കൂര്‍ നീണ്ട ശസ്ത്രക്രിയയില്‍ റോഡ്‌സും സ്‌ക്രൂവും ഉപയോഗിച്ച് ബലപ്പെടുത്തി.

പഠനച്ചെലവിന് മീന്‍വില്‍പന നടത്തിയതിലൂടെ ശ്രദ്ധേയയായ ഹനാന്റെ ആരോഗ്യനില മന്ത്രിമാരായ കെ കെ ശൈലജ, തോമസ് ഐസക്, ഇ പി ജയരാജന്‍, പ്രതിപക്ഷ നേതാവ് രമേഷ് ചെന്നിത്തല, എസ് ശര്‍മ എംഎല്‍എ തുടങ്ങിവര്‍ ആശുപത്രിയില്‍ വിളിച്ച് അന്വേഷിച്ചു.