ഡോ. സജിത് ബാബു പുതിയ കാസര്‍കോട് കളക്ടര്‍?

Whatsapp Group Whatsapp Channel

By Web Desk SUAug 14, 2018, 14:39 IST

കാസര്‍കോട്: (www.kasargodvartha.com 14.08.2018) ഡോ. സജിത് ബാബു ദാമോദരന്‍ ഐഎഎസിനെ പുതിയ കാസര്‍കോട് കളക്ടറായി നിയമിച്ചതായി വിവരം. ചൊവ്വാഴ്ച ചേര്‍ന്ന മന്ത്രിസഭ യോഗത്തിലാണ് ഇക്കാര്യം പരിഗണിച്ചത്. സര്‍ക്കാരിന്റെ ഔദ്യോഗിക അറിയിപ്പ് വൈകീട്ടോടെ ഉണ്ടാകുമെന്നാണ് പ്രതീക്ഷിക്കുന്നത്. പുതിയ കളക്ടറായി ഡോ. സജിത് ബാബുവിന്റെ പേര് റവന്യു മന്ത്രിയുടെ ഓഫീസില്‍ നിന്നും മന്ത്രിസഭയുടെ പരിഗണനയ്ക്കായി അയച്ചിരുന്നു.

നേരത്തെ കാസര്‍കോട് കളക്ടര്‍ ആയിരുന്ന കെ ജീവന്‍ ബാബുവിനെ ഇടുക്കി കളക്ടര്‍ ആയി നിയമിച്ചിരുന്നുവെങ്കിലും പകരം കളക്ടറെ നിയമിച്ചിരുന്നില്ല. ഒന്നര മാസത്തോളമായി കാസര്‍കോട്ട് കളക്ടറില്ലാത്ത അവസ്ഥയായിരുന്നു. എഡിഎം എന്‍ ദേവീദാസിനായിരുന്നു കളക്ടറുടെ ചുമതല കൈമാറിയിരുന്നത്.

ഇപ്പോള്‍ കാസര്‍കോട്ടേക്ക് പുതുതായി നിയമിച്ച ഡോ. സജിത് ബാബു സഹകരണ സംഘം രജിസ്ട്രാര്‍ ആണ്. നേരത്തെ അസാപ് സിഇഒ ആയും പ്രവര്‍ത്തിച്ചിരുന്നു. തിരുവനന്തപുരം സ്വദേശിയാണ്.