തലസ്ഥാനത്ത് 68 ക്യാമ്പുകള്‍; 5,753 പേര്‍ സുരക്ഷിത കേന്ദ്രങ്ങളില്‍

തിരുവനന്തപുരം: (www.kasargodvartha.com 18.08.2018) മഴക്കെടുതിയെത്തുടര്‍ന്ന് തിരുവനന്തപുരം ജില്ലയില്‍ 68 ദുരിതാശ്വാസ ക്യാമ്പുകളാണ് ഇപ്പോള്‍ പ്രവര്‍ത്തിക്കുന്നത്. ചിറയിന്‍കീഴ്, നെയ്യാറ്റിന്‍കര, കാട്ടാക്കട നെടുമങ്ങാട്, വര്‍ക്കല എന്നീ ആറു താലൂക്കുകളിലുമായി 1,688 കുടുംബങ്ങളിലായി 5,753 പേരാണു ദുരിതാശ്വാസ കേന്ദ്രങ്ങളില്‍ കഴിയുന്നത്. ഇതില്‍ 2399 പേര്‍ സ്ത്രീകളാണ്. 1949 പുരുഷന്‍മാരും, 1135 കുട്ടികളും ക്യാമ്പുകളിലുണ്ട്.

എല്ലാ ക്യാമ്പുകളിലും ഭക്ഷണവും കുടിവെള്ളവും ലഭ്യമാകുന്നുണ്ടെന്ന് ക്യാമ്പുകളുടെ ചുമതലയുള്ള തഹസില്‍ദാര്‍മാര്‍ അറിയിച്ചു. സന്നദ്ധ സംഘടനകളും വ്യക്തികളും ക്യാമ്പുകളില്‍ എത്തിക്കുന്ന ആഹാരത്തിനു പുറമെ അതത് താലൂക്ക് ഓഫീസുകള്‍ കേന്ദ്രീകരിച്ച് ജീവനക്കാരും വോളന്റിയര്‍മാരും ആഹാരം പാകം ചെയ്ത് ആവശ്യക്കാര്‍ക്ക് എത്തിക്കുകയും ചെയ്യുന്നുണ്ട്. എല്ലാ ക്യാമ്പുകളിലും മെഡിക്കല്‍ സേവനം ലഭ്യമാക്കുന്നുണ്ടെന്നും അധികൃതര്‍ അറിയിച്ചു.