ആ അമ്മ പോലും പറയുന്നു; അവന്‍ ചെയ്ത തെറ്റിന് ശിക്ഷ കിട്ടണം, ഫഹദിനെ കൊലപ്പെടുത്തിയ കേസില്‍ പ്രതി വിജയന്റെ അമ്മയുടെ വാക്കുകള്‍

കാഞ്ഞങ്ങാട്: (www.kasargodvartha.com 19.06.2018) ആ അമ്മ പോലും പറയുന്നു. അവന്‍ തെറ്റ് ചെയ്തിട്ടുണ്ടെങ്കില്‍ അതിനുള്ള ശിക്ഷ അവന് കിട്ടണം. മൂന്നാം ക്ലാസ് വിദ്യാര്‍ത്ഥിയായ പെരിയ കല്യോട്ടെ ഫഹദിനെ കൊലപ്പെടുത്തിയ കേസില്‍ പ്രതി വിജയനെ കോടതി ശിക്ഷിച്ചപ്പോഴാണ് വിജയന്റെ അമ്മയുടെ ഈ വാക്കുകള്‍. ജീവപര്യന്തം തടവു ശിക്ഷ അവന് കോടതി വിധിച്ച വിവരം അറിഞ്ഞിട്ടും ആ അമ്മയ്ക്കും സങ്കടമില്ല.

അവന്റെ മുഖം കാണാനോ സഹായിക്കാനോ തനിക്ക് മനസു വന്നില്ലെന്ന് മാതാവ് വെള്ളച്ചി പ്രതികരിച്ചു. അവനെ രക്ഷിക്കണമെന്നും കേസ് നടത്തണമെന്നും സഹായിക്കാമെന്നും പറഞ്ഞ് പലരും സമീപിച്ചിരുന്നു. എന്നാല്‍ അവരെയെല്ലാം മടക്കുകയായിരുന്നുവെന്നും വെള്ളച്ചി കൂട്ടിച്ചേര്‍ത്തു. വലിയ കടുംകൈയാണ് തന്റെ മകന്‍ ആ പിഞ്ചുകുഞ്ഞിനോട് ചെയ്തതെന്നാണ് വെള്ളച്ചിക്കും പറയാനുള്ളത്. ചെയ്ത തെറ്റിന് അവന്‍ ശിക്ഷ അനുഭവിക്കണം.

തന്റെ മകന്‍ ചെയ്ത തെറ്റിന് ഇപ്പോഴും ശിക്ഷ അനുഭവിക്കുന്നത് ഫഹദിന്റെ മാതാവും വീട്ടുകാരുമാണ്. അവര്‍ ഇന്നും തന്നെ അന്യയായി കാണുന്നില്ലെന്നും തന്റെ എല്ലാ കാര്യങ്ങളിലും ഫഹദിന്റെ വീട്ടുകാര്‍ തനിക്കൊപ്പമുണ്ട്. ഒരുതരത്തിലും അവരോ ബന്ധുക്കളോ ഇതിന്റെ പേരില്‍ തങ്ങളെ ഉപദ്രവിക്കുകയോ ദ്രോഹിക്കുകയോ ചെയ്തിട്ടില്ല. സംഭവമറിഞ്ഞ് തങ്ങള്‍ വീട്ടില്‍ നിന്നും പേടിയോടെ പോയപ്പോള്‍ തിരിച്ചുവരാന്‍ പ്രേരിപ്പിച്ചത് ഫഹദിന്റെ വീട്ടുകാര്‍ തന്നെയാണ്. വിജയന്റെ തെറ്റിന് വീട്ടുകാര്‍ എന്തു പിഴച്ചു എന്നായിരുന്നു ഫഹദിന്റെ കുടുംബം ചോദിച്ചത്. സ്വന്തം വീട്ടില്‍ നില്‍ക്കാന്‍ ഭയമാണെങ്കില്‍ തങ്ങളുടെ പഴയ വീട് താമസിക്കാനായി നല്‍കാമെന്നും ഫഹദിന്റെ പിതാവ് അബ്ബാസ് പറഞ്ഞതായും വെള്ളച്ചി പറയുന്നു. സംഭവം നടക്കുന്നതിന്റെ തലേദിവസം പോലും ഫഹദ് തന്റെ വീട്ടില്‍ കളിക്കാന്‍ വന്നിരുന്നതായി വെള്ളച്ചി ഓര്‍ക്കുന്നു.

ശിക്ഷ പ്രഖ്യാപിക്കുന്നതിന് ഒരാഴ്ച മുമ്പ് താന്‍ ഫഹദിന്റെ വീട്ടില്‍ പോയിരുന്നു. തന്നെ കൈപിടിച്ച് വീട്ടിലേക്ക് അവര്‍ സ്വീകരിക്കുകയായിരുന്നു. ഈ സമയം തനിക്ക് കണ്ണീര്‍ അടക്കാനായില്ലെന്നും വിങ്ങിപ്പൊട്ടിയപ്പോള്‍ ആശ്വസിപ്പിച്ചത് ഫഹദിന്റെ മാതാവ് ആഇശയാണെന്നും വെള്ളച്ചി കൂട്ടിച്ചേര്‍ത്തു.