ഞങ്ങളും നികുതിയടച്ച് ഓടുന്നവരാണ് സര്‍...! വിഐപികളെ കടത്തിവിടാന്‍ ട്രാഫിക് സിഗ്നല്‍ നിര്‍ത്തിവെച്ച് പോലീസ്, ജനം ദുരിതത്തിലായി

കൊട്ടാരക്കര: (www.kasargodvartha.com 22.10.2017) വിഐപികളെ കടത്തിവിടാന്‍ പോലീസ് ട്രാഫിക് സിഗ്നല്‍ നിര്‍ത്തിവെക്കുന്നതായി ആക്ഷേപം. ഇതുമൂലം ജനം ദുരിതത്തിലാവുകയാണ്. കൊട്ടാരക്കരയിലാണ് വിഐപികളെ കടത്തിവിടാന്‍ പോലീസ് ട്രാഫിക് സിഗ്നല്‍ പ്രവര്‍ത്തനം നിര്‍ത്തിവെക്കുന്നത്. ഇത്തരത്തില്‍ മൂന്നുതവണയാണ് ശനിയാഴ്ച ട്രാഫിക് സിഗ്നല്‍ പ്രവര്‍ത്തനം നിര്‍ത്തിവെച്ചത്. ഇത് വലിയ ഗതാഗതക്കുരുക്കിന് കാരണമായി.

മണിക്കൂറുകള്‍ നീണ്ട ക്യൂവാണ് കൊട്ടാരക്കരയില്‍ അനുഭവപ്പെട്ടത്. വിഐപിയുടെ യാത്ര സുഗമമാക്കാന്‍ രണ്ടു വശങ്ങളിലെ വാഹനങ്ങള്‍ മാത്രമാണ് കഴിഞ്ഞ ദിവസം കടത്തിവിട്ടത്. ഇതുമൂലം കൊല്ലം -പുനലൂര്‍ റൂട്ടില്‍ വാഹനഗതാഗതം ഒരു മണിക്കൂറോളം തടസപ്പെട്ടു. ആശുപത്രിയിലേക്കു രോഗികളുമായി പോയ വാഹനങ്ങള്‍ ഉള്‍പ്പെടെ ക്യൂവില്‍ കിടന്ന് ദുരിതത്തിലായി.

പോലീസ് സിഗ്നല്‍ പ്രവര്‍ത്തനം നിര്‍ത്തിവെച്ച് ജനങ്ങളെ ദുരിതത്തിലാക്കുന്നതിനെതിരെ പ്രതിഷേധം ശക്തമാണ്.
Photo: Representational