സനമോളുടെ ചേതനയറ്റ ശരീരം കോരിയെടുത്തത് വിപിനും ധനേഷും; ഊണും ഉറക്കവും ഉപേക്ഷിച്ച് നാട്ടുകാര്‍ നടത്തിയ രക്ഷാപ്രവര്‍ത്തനം ചര്‍ച്ചയാകുന്നു

പാണത്തൂര്‍: (www.kasargodvartha.com 10.08.2017) നാട് മുഴുവന്‍ പുഴയിലും കരയിലും സനക്കായി തിരച്ചില്‍ തുടരുന്നതിനിടെ കുട്ടിയുടെ ചേതനയറ്റ ശരീരം കോരിയെടുത്തത് തീര്‍ത്ഥങ്കരയിലെ വിപിനും ധനേഷും നാടിന്റെ പ്രശംസ പിടിച്ചുപറ്റി. കാണാതായതു മുതല്‍ സനക്കായി ദുരന്തനിവാരണ സേനയുള്‍പ്പെടെ നടത്തിയ തിരച്ചില്‍ വിഫലമായപ്പോഴാണ് തീരദേശ സേനയിലെ നീന്തല്‍ വിദഗ്ദ്ധന്‍ നീലേശ്വരം തൈക്കടപ്പുറത്തെ എം ടി പി സെയ്ഫുദ്ദീന്റെ നേതൃത്വത്തില്‍ നീന്തലില്‍ പ്രത്യേക പരിശീലനം ലഭിച്ച നാല്‍പ്പതംഗ സംഘം പാണത്തൂര്‍ മുതല്‍ തളങ്കര വരെ പുഴയില്‍ തിരച്ചില്‍ നടത്തിയത്.

വിപിനും ധനേഷും കൂട്ടുകാരായ രഞ്ജിത്ത്, സനീഷ്, ജിഷ്ണു എന്നിവര്‍ പവിത്രംകയം ഭാഗത്തായിരുന്നു തിരച്ചില്‍ നടത്തിക്കൊണ്ടിരുന്നത്. ഇതിനിടയിലാണ് ഏറെ മുന്നിലുണ്ടായിരുന്ന വിപിന്‍ പുഴയുടെ നടുവിലുള്ള ആറ്റുവഞ്ചി മരത്തിന്റെ ചില്ലയില്‍ തൂങ്ങിയാടുന്ന നിലയില്‍ സനയുടെ മൃതദേഹം കണ്ടത്. ചില്ല അനങ്ങിയാല്‍ ഏത് നിമിഷവും ഒഴുകിപ്പോകാന്‍ പാകത്തിലായിരുന്നു മൃതദേഹം കിടന്നിരുന്നത്. ഉടന്‍ തന്നെ വിപിന്‍ കൂടെയുണ്ടായിരുന്ന ധനേഷിനെ വിളിച്ച് ഇരുവരും ചേര്‍ന്ന് സനമോളെ കോരിയെടുത്ത് കരയിലേക്ക് കൊണ്ടുവന്നു. സഹായത്തിനായി അപ്പോഴേക്കും മറ്റുള്ളവരും എത്തിയിരുന്നു. ദുരന്ത നിവാരണസേന ഉള്‍പ്പെടെ തിരച്ചിലില്‍ നിന്ന് പിന്മാറിയപ്പോള്‍ കാഞ്ഞങ്ങാട് ഡിവൈഎസ്പി കെ ദാമോദരനാണ് നീന്തലില്‍ വൈദഗ്ധ്യമുള്ളവരെക്കൊണ്ട് തിരച്ചില്‍ നടത്താനുള്ള നിര്‍ദ്ദേശം തീരദേശ സേനയിലെ നീന്തല്‍ വിദഗ്ധനായ സെയ്ഫുദ്ദീനോട് ആലോചിച്ചത്.

തുടര്‍ന്ന് അന്വേഷണത്തിന് നേതൃത്വം കൊടുക്കുന്ന വെള്ളരിക്കുണ്ട് സിഐ എം സുനില്‍കുമാര്‍ നീന്തല്‍ വിദഗ്ധരുടെ സഹായം തേടിക്കൊണ്ട് വാട്സ് ആപ്പ് സന്ദേശമയച്ചു. ഇതിന്‍പ്രകാരം പാലാവയല്‍, വെള്ളൂര്‍, മഞ്ചേശ്വരം, തീര്‍ത്ഥങ്കര, കണിച്ചിറ റെഡിസ്റ്റാര്‍ ക്ലബ്ബ് എന്നിവിടങ്ങളില്‍ നിന്നുള്ള നീന്തല്‍ വിദഗ്ധര്‍ സ്വമേധയാ തിരച്ചിലിന് സന്നദ്ധരായി എത്തുകയായിരുന്നു. ഇവര്‍ക്കൊപ്പം പാണത്തൂരിലെയും പരിസരങ്ങളിലെയും നൂറുകണക്കിന് നാട്ടുകാരും ഊണും ഉറക്കവുമില്ലാതെ നടത്തിയ തിരച്ചിലിലാണ് സനയുടെ മൃതദേഹം കണ്ടെത്താനായത്.