കാലിയാ റഫീഖ് വധം; ബ്ലേഡ് സാദിഖ് പിടിയില്‍, തോക്ക് പിടിച്ചെടുത്തു

ഉപ്പള: (www.kasargodvartha.com 22/02/2017) ഗുണ്ടാതലവന്‍ ഉപ്പള മണിമുണ്ടയിലെ കാലിയാ റഫീഖിനെ വെടി വെച്ചും വെട്ടിയും കൊലപ്പെടുത്തിയ കേസില്‍ ഒരാളെ കൂടി പോലീസ് അറസ്റ്റു ചെയ്തു. സാദിഖ് എന്ന ബ്ലേഡ് സാദിഖിനെയാണ് പോലീസ് പിടികൂടിയത്. വാകൊടങ്കഴി സ്വദേശിയും വിട്ടലിലെ ഫഌറ്റില്‍ താമസക്കാരനുമാണ് സാദിഖ്. അക്രമം, മോഷണം ഉള്‍പെടെ നിരവധി കേസുകളില്‍ പ്രതിയാണ് സാദിഖെന്ന് പോലീസ് പറഞ്ഞു.

കേസില്‍ നേരത്തെ നാലു പേരെ പോലീസ് അറസ്റ്റു ചെയ്തിരുന്നു. മണ്ണംകുഴിയിലെ നൂര്‍അലി, റഷീദ്, പൈവളിഗെ ബായിക്കട്ടയലെ ഫദ്ദു എന്ന പദ്മനാഭന്‍, ഉപ്പള വിജയ ബാങ്കിന് സമീപത്തെ റഊഫ് എന്ന മീശ റഊഫ് എന്നിവരാണ് നേരത്തെ അറസ്റ്റിലായത്.

ഇക്കഴിഞ്ഞ ഫെബ്രുവരി 15നാണ് മംഗളൂരു കെ.സി റോഡില്‍ വെച്ച് കാലിയാ റഫീഖ് കൊല്ലപ്പെട്ടത്. മംഗളൂരു ഭാഗത്തേക്ക് പോവുകയായിരുന്ന കാലിയാ റഫീഖും സംഘവും സഞ്ചരിച്ച റിറ്റ്‌സ് കാറില്‍ ടിപ്പര്‍ ലോറി വന്നിടിച്ച ശേഷം പിന്നാലെ മറ്റൊരു കാറിലെത്തിയ സംഘം കാലിയാ റഫീഖിനെ വെടിവെച്ചും വെട്ടിയും കൊലപ്പെടുത്തുകയായിരുന്നു.