അനധികൃതമായി കൃഷി ആവശ്യത്തിന് വെളളം ഉപയോഗിക്കുന്നവരുടെ പമ്പ്‌സെറ്റ് കണ്ടുകെട്ടുമെന്ന് ജില്ലാകലക്ടര്‍; കുഴല്‍കിണര്‍ കുഴിക്കുന്നതിന് മുന്‍കൂര്‍ അനുമതി വേണം

കാസര്‍കോട്: (www.kasargodvartha.com 04.02.2017) അനധികൃതമായി കൃഷി ആവശ്യത്തിന് വെളളം ഉപയോഗിക്കുന്നവരുടെ പമ്പ്‌സെറ്റ് കണ്ടുകെട്ടും. പഞ്ചായത്ത് കെട്ടിടനിര്‍മ്മാണ ചട്ട പ്രകാരം തുറന്ന കിണര്‍, കുഴല്‍ കിണര്‍, ഹാന്‍ഡ് പമ്പ് കിണര്‍ എന്നിവ സ്ഥാപിക്കാന്‍ പഞ്ചായത്തിന്റെ അനുമതി വാങ്ങണമെന്ന് ജില്ലാകളക്ടര്‍ കെ ജീവന്‍ബാബുവിന്റെ അധ്യക്ഷതയില്‍ നടന്ന ജില്ലാതല അവലോകനസമിതി യോഗത്തില്‍ തീരുമാനമായി.

2002 ലെ കേരള ഭൂജല നിയമപ്രകാരം ചെങ്കള, മധൂര്‍, മൊഗ്രാല്‍ പുത്തൂര്‍, ചെമ്മനാട്, ബേഡഡുക്ക, കുറ്റിക്കോല്‍, ദേലംപാടി, കാറഡുക്ക, മുളിയാര്‍ എന്നീ പഞ്ചായത്തുകളും കാസര്‍കോട് നഗരസഭയും വിജ്ഞാപനം ചെയ്യപ്പെട്ട പ്രദേശങ്ങളാണ്. ഇവിടങ്ങളില്‍ കുഴല്‍ കിണര്‍ കുഴിക്കുന്നതിന് ഭൂജല അതോറിറ്റിയുടെ മുന്‍കൂര്‍ അനുമതി ആവശ്യമാണ്. അനുമതിയില്ലാതെ കുഴല്‍ കിണര്‍ കുഴിക്കുന്നവര്‍ക്കെതിരെ ഭൂജല വകുപ്പ്, പോലീസ്, പഞ്ചായത്ത് എന്നീ വകുപ്പുകള്‍ നടപടി സ്വീകരിക്കും.