ബേവിഞ്ച വെടിവെപ്പ്: മനീഷ് ഷെട്ടിയെ തിങ്കളാഴ്ച കോടതിയില്‍ ഹാജരാക്കും

കാസര്‍കോട്: (www.kasargodvartha.com 31.08.2014) ബേവിഞ്ചയിലെ കരാറുകാരന്റെ വീടിനുനേരെ വെടിവെച്ച സംഭവത്തില്‍ പോലീസ് കസ്റ്റഡിയില്‍ വാങ്ങിയ കുപ്രസിദ്ധ കുറ്റവാളി മനീഷ് ഷെട്ടി (40) യെ തിങ്കളാഴ്ച കാസര്‍കോട് കോടതിയില്‍ തിരികെ ഹാജരാക്കും. ആറു ദിവസം മുമ്പാണ് മനീഷ് ഷെട്ടിയെ ബാംഗ്ലൂര്‍ പരപ്പന അഗ്രഹാര ജയിലില്‍ നിന്ന് പോലീസ് കാസര്‍കോട്ട് കൊണ്ടു വന്നത്.

വെടിവെപ്പ് കേസിന്റെ മുഖ്യ സൂത്രധാരനാണ് ഇയാളെന്ന് ചോദ്യം ചെയ്യലില്‍ വ്യക്തമായതായി അന്വേഷണ ഉദ്യോഗസ്ഥര്‍ സൂചിപ്പിച്ചു. നിലവില്‍ ഇയാളെ രണ്ടാം പ്രതിയാക്കിയാണ് പോലീസ് കേസെടുത്തിരിക്കുന്നത്.  കേസില്‍ നേരത്തെ അറസ്റ്റിലായ പ്രതികള്‍ക്ക് ഒത്താശ ചെയ്ത് കൊടുത്തത് മനീഷ് ഷെട്ടിയാണെന്നും പോലീസ് പറഞ്ഞു.

ബാംഗ്ലൂരിലെ ചെമ്മണ്ണൂര്‍ ജ്വല്ലറിയില്‍ നിന്ന് 40 കിലോ സ്വര്‍ണം കവര്‍ന്ന കേസില്‍ 10 വര്‍ഷം ശിക്ഷിക്കപ്പെട്ട് ജയിലില്‍ കഴിഞ്ഞ് വരികയാണ് മനീഷ് ഷെട്ടി. ഇതിനകം ഏഴ് വര്‍ഷം തടവ് പൂര്‍ത്തിയാക്കി. ഒരു ഇരട്ടക്കൊലപാതകക്കേസ് ഉള്‍പ്പെടെ നാല് കൊലപാതക്കേസുകളിലും അഞ്ച് വധശ്രമക്കേസുകളിലും നിരവധി മറ്റു കുറ്റകൃത്യങ്ങളിലും ഇയാള്‍ പ്രതിയാണെന്ന് പോലീസ് പറഞ്ഞു.

ഉഡുപ്പി സ്വദേശിയായ മനീഷ് ഷെട്ടി ചെറുപ്പത്തിലേ നാടുവിട്ടതായിരുന്നു. ചെറിയ കുറ്റകൃത്യങ്ങളിലൂടെയാണ് കൊലപാതകമടക്കമുള്ള വലിയ കുറ്റകൃത്യങ്ങള്‍ ചെയ്യുന്നതിലേക്ക് ഇയാള്‍ വളര്‍ന്നത്. നിരവധി കുറ്റവാളികള്‍ അടങ്ങുന്ന സംഘത്തിലെ കണ്ണിയും ചിലപ്പോഴെല്ലാം നായകനും ആയി മാറുന്ന മനീഷ് ഷെട്ടി പോലീസിന് തലവേദന സൃഷ്ടിക്കുന്ന നിരവധി കുറ്റകൃത്യങ്ങളുമായി ബന്ധം പുലര്‍ത്തുന്ന ആളാണ്.