സി.ഐ.ടി.യു സംസ്ഥാന സമ്മേളനത്തിന് ഉജ്ജ്വല തുടക്കം

കാസര്‍കോട്: മൂന്നു ദിവസം നീണ്ടു നില്‍ക്കുന്ന സി.ഐ.ടി.യു സംസ്ഥാന സമ്മേളനത്തിന് കാസര്‍കോട്ട് ഉജ്ജ്വല തുടക്കം. ശനിയാഴ്ച രാവിലെ പുലിക്കുന്നിലെ സന്ധ്യാരാഗം ഓഡിറ്റോറിയത്തില്‍ സജ്ജമാക്കിയ വരദരാജപൈ നഗറില്‍ പ്രതിനിധി സമ്മേളനം സി.ഐ.ടി.യു അഖിലേന്ത്യാ ജനറല്‍ സെക്രട്ടറി തപന്‍സെന്‍ എം.പി. ഉദ്ഘാടനം ചെയ്തു. സംസ്ഥാന പ്രസിഡന്റ് കെ.എന്‍. രവീന്ദ്രനാഥ് അധ്യക്ഷത വഹിച്ചു.

ഐ.എന്‍.ടി.യു.സി സംസ്ഥാന പ്രസിഡന്റ് ആര്‍. ചന്ദ്രശേഖരന്‍, എ.ഐ.ടി.യു.സി ജനറല്‍ സെക്രട്ടറി കാനം രാജേന്ദ്രന്‍, യു.ടി.യു.സി അഖിലേന്ത്യാ പ്രസിഡന്റ് എ.എ. അസീസ് എം.എല്‍.എ, ബി.എം.എസ്. സംസ്ഥാന പ്രസിഡന്റ് പ്രഭാകരന്‍, എസ്.ടി.യു. ജനറല്‍ സെക്രട്ടറി അഹ്മദ് കുട്ടി ഉണ്ണിക്കുളം സി.ഐ.ടി.യു അഖിലേന്ത്യാ പ്രസിഡന്റ് എ.കെ. പത്മനാഭന്‍, സംസ്ഥാന ജനറല്‍ സെക്രട്ടറി എം.എം. ലോറന്‍സ്, എളമരം കരീം തുടങ്ങിയവര്‍ പ്രസംഗിച്ചു. പി. കരുണാകരന്‍ എം.പി സ്വാഗതം പറഞ്ഞു.

ഉദ്ഘാടനത്തിന് മുന്നോടിയായി മലബാര്‍ ദേവസ്വം എംപ്‌ളോയിസ് യൂണിയന്റെ (സി.ഐ.ടി.യു) ആഭിമുഖ്യത്തില്‍ പഞ്ചവാദ്യവും മുന്നാട് കേരള കലാക്ഷേത്രത്തിന്റെ ആഭിമുഖ്യത്തില്‍ സ്വാഗത ഗാനവും അരങ്ങേറി. സി.ഐ.ടി.യു സംസ്ഥാന പ്രസിഡന്റ് കെ. രവീന്ദ്രനാഥ് പതാക ഉയര്‍ത്തിയ ശേഷമാണ് സമ്മേളനം ആരംഭിച്ചത്.


വൈകിട്ട് 3.30ന് പുതിയ ബസ് സ്റ്റാന്‍ഡ് പരിസരത്തെ കെ. പത്മനാഭന്‍ നഗറില്‍ മതനിരപേക്ഷത നേരിടുന്ന വെല്ലുവിളികള്‍ എന്ന വിഷയത്തില്‍ സെമിനാര്‍ നടക്കും. സി.പി.എം. സംസ്ഥാന സെക്രട്ടറി പിണറായി വിജയന്‍ സെമിനാര്‍ ഉദ്ഘാടനം ചെയ്യും. സ്വാഗത സംഘം ചെയര്‍മാന്‍ പി. കരുണാകരന്‍ എം.പി അധ്യക്ഷത വഹിക്കും.