യു.ഡി.എഫിലെ അധികാര വടംവലി സമുദായാന്തരീക്ഷം തകര്‍ക്കുന്നു: പ്രൊ. അബ്ദുല്‍ വഹാബ്

കാസര്‍കോട്: യു.ഡി.എഫില്‍ ഇപ്പോള്‍ നടക്കുന്ന അധികാര വടംവലി കേരളത്തില്‍ നിലനില്‍ക്കുന്ന മതസൗഹാര്‍ദാന്തരീക്ഷം തകര്‍ക്കുമെന്നും സാമുദായിക ധ്രുവീകരണത്തിന് കാരണമാകുമെന്നും ഐ.എന്‍.എല്‍. സംസ്ഥാന ജനറല്‍ സെക്രട്ടറി പ്രൊഫ. എ.പി. അബ്ദുല്‍ വഹാബ് വാര്‍ത്താസമ്മളനത്തില്‍ പ്രസ്താവിച്ചു. ജാതിമത സംഘടനകള്‍ക്കും അവയുടെ താല്‍പര്യങ്ങള്‍ക്കും വഴങ്ങി കൊടുത്തതിന്റെ പരിണിത ഫലമാണ് യു.ഡി.എഫ് ഇപ്പോള്‍ അനുഭവിക്കുന്നത്. കേരളത്തിലെ പൊതുജനങ്ങള്‍ അഭിമുഖീകരിക്കുന്ന വിലക്കയറ്റം, സാമ്പത്തിക പ്രതിസന്ധി തുടങ്ങിയ ജീവല്‍ പരമായ പ്രശ്‌നങ്ങളില്‍ നിന്നും ജനശ്രദ്ധ തിരിച്ചുവിടാനുള്ള ആസൂത്രിത ശ്രമത്തിന്റെ ഭാഗമാണ് ഇപ്പോഴത്തെ വിവാദമെന്ന് സംശയിക്കുന്നതായും അദ്ദേഹം പറഞ്ഞു.

കേന്ദ്ര സര്‍ക്കാറിന്റെ തെറ്റായ സാമ്പത്തിക നയങ്ങളുടെ പ്രത്യാഘാതമാണ് രാജ്യത്തെ ജനങ്ങള്‍ ഇന്ന് അഭിമുഖീകരിക്കുന്നത്. വൈദ്യുതി, ഗതാഗതം തുടങ്ങിയ മേഖലകളില്‍ പ്രതിസന്ധി രൂക്ഷമാണെന്ന് വരുത്തി ജനങ്ങള്‍ക്കുമേല്‍ അധിക ഭാരം കെട്ടിവെക്കുകയാണ്. കേരളത്തിലെ 50 ശതമാനം വൈദ്യുതി മീറ്ററുകളും കാര്യക്ഷമമല്ല. കെ.എസ്.ആര്‍.ടി.സി.യെ പ്രതിസന്ധിയിലെത്തിച്ചിരിക്കുന്നത് സ്വകാര്യ ബസ് മുതലാളിമാരെ വഴിവിട്ട് സഹായിക്കാനാണ്. ഒരോവര്‍ഷവും രാജ്യത്ത് വിളവെടുപ്പ് റെക്കാര്‍ഡിലേക്ക് കുതിക്കുമ്പോഴും വിലക്കയറ്റം ഉണ്ടാകുന്നത് റിലയന്‍സ് പോലുള്ള വന്‍കിട കുത്തക കമ്പനികള്‍ സൃഷ്ടിക്കുന്ന കൃത്രിമമായ ക്ഷാമം മൂലമാണ്.

ചെറുകിട വ്യാപാര മേഖലകളിലേക്ക് വിദേശ നിക്ഷേപത്തെ കടത്തിവിട്ടതും വിലക്കയറ്റതിന് കരാണമാകുമെന്ന് അബ്ദുല്‍വഹാബ് ചൂണ്ടിക്കാട്ടി. കേന്ദ്രത്തില്‍ നിന്നും ലഭിക്കുന്ന താല്‍ക്കാലിക ധനസഹായങ്ങള്‍ കൊണ്ട് പ്രശ്‌നം പരിഹരിക്കാമെന്ന് ധരിക്കുന്നത് മൗഢ്യമാണ്. മഅ്ദനിക്ക് ജാമ്യം ലഭിക്കാന്‍ കേന്ദ്ര-സംസ്ഥാന സര്‍ക്കാറുകള്‍ ഇടപെടണമെന്നും അദ്ദേഹം ആവശ്യപ്പെട്ടു. ദേശീയ മനുഷ്യാവകാശ കമ്മീഷന്‍ ഇക്കാര്യത്തില്‍ ഇടപെടണം. അഞ്ചാം മന്ത്രിയെ മുസ്ലിം ലീഗ് നേടിയെടുത്ത രീതി ശരിയല്ലെന്നും അവരുടെ സംസ്ഥാന നേതാവ് പ്രഖ്യാപിച്ചുപോയതിനാല്‍ മന്ത്രിസ്ഥാനം കഴുത്തില്‍കത്തിവെച്ച് വാങ്ങിയതാണെന്നും കോണ്‍ഗ്രസിന്റെ പ്രമുഖ നേതാക്കള്‍ തന്നെ വ്യക്തമാക്കിയ കാര്യം അദ്ദേഹം ചൂണ്ടിക്കാട്ടി.

സമുദായ സംഘടനകള്‍ക്ക് അഭിപ്രായം പറയുന്നതിന് അതിന്റേതായ രീതിയുണ്ട്. ഇതിന് വിപരീതമായി കാര്യങ്ങള്‍ പോകുന്നതും ജനാധിപത്യ മര്യാദയ്ക്ക് നിരക്കാത്ത രീതിയിലുള്ള വിധേയത്വത്തില്‍ നിന്ന് യു.ഡി.എഫ്. പുറത്തുവരണം. ഐ.എന്‍.എല്ലില്‍ പിളപ്പുണ്ടാകുമെന്ന പ്രചരണം പ്രവര്‍ത്തകരില്‍ ആശയകുഴപ്പം ഉണ്ടാക്കാനുള്ള ശ്രമത്തിന്റെ ഭാഗമാണെന്ന് അദ്ദേഹം മാധ്യപ്രവര്‍ത്തകരുടെ ചോദ്യങ്ങളോട് പ്രതികരിച്ചു. മുസ്ലിം ലീഗുമായി ഒരിക്കലും യോജിക്കാന്‍ സാധിക്കില്ല. നയപരമായ ഒട്ടേറെ കാര്യങ്ങളില്‍ ലീഗുമായി ഐ.എന്‍.എല്ലിന് അഭിപ്രായ വ്യത്യാസമുണ്ട്. അവസരവാദികളാണ് ഐ.എന്‍.എല്ലില്‍ നിന്നും നേരത്തെ പുറത്തുപോയവരെന്നും അബ്ദുല്‍ വഹാബ് കുറ്റപ്പെടുത്തി.

കെ.എ. റഊഫ് ഐ.എന്‍.എല്ലിന്റെ സാധാരണ മെമ്പര്‍ മാത്രമാണെന്നും അതിനപ്പുറത്തേക്ക് അദ്ദേഹത്തെ കൊണ്ടുപോയിട്ടില്ലെന്നും മാധ്യമപ്രവര്‍ത്തകരുടെ മറ്റൊരു ചോദ്യത്തിന് മറുപടിയായി അബ്ദുല്‍ വഹാബ് പ്രതികരിച്ചു. ഐ.എന്‍.എല്ലിന്റെ 20-ാം വാര്‍ഷികത്തിന്റെ ഭാഗമായി ഫെബ്രുവരി 11ന് കോഴിക്കോട്ട് ചേരുന്ന സംസ്ഥാന കൗണ്‍സില്‍ യോഗം വിവധ പരിപാടികള്‍ ആവിഷ്‌ക്കരിക്കുമെന്നും അദ്ദേഹം കൂട്ടിച്ചേര്‍ത്തു. മാധ്യമ പ്രവര്‍ത്തകയായ കെ.കെ. ഷാഹിനയെ കര്‍ണാടകയില്‍ കള്ളക്കേസില്‍ കുടുക്കിയതിനെതിരെ ഐ.എന്‍.എല്‍. കോഴിക്കോട്ട് പ്രതിഷേധ പരിപാടി സംഘടിപ്പിക്കാനും തീരുമാനിച്ചിട്ടുണ്ടെന്നും അബ്ദുലല്‍ വഹാബ് പറഞ്ഞു.

വാര്‍ത്താസമ്മേളനത്തില്‍ ജില്ലാ പ്രസിഡണ്ട് പി.എ. മുഹമ്മദ്കുഞ്ഞി ഹാജി, ജനറല്‍ സെക്രട്ടറി അസീസ് കടപ്പുറം, സംസ്ഥാന സെക്രട്ടറി കെ.എസ്. ഫക്രുദ്ദിന്‍, സംസ്ഥാന കമ്മിറ്റി അംഗം മൊയ്തീന്‍ കുഞ്ഞി കളനാട്, ദേശീയ സമിതി അംഗം എം.എ. ലത്തീഫ്, സി.എം.എ. ജലീല്‍, മുസ്തഫ തോരവളപ്പ്, റഹിം ബെണ്ടിച്ചാല്‍ എന്നിവരും സംബന്ധിച്ചു.

Keywords:  INL, Press meet, Kerala, Kasaragod, UDF, KSRTC, Abdul Vahab, K.A. Rahoof, Media Worker, Malayalam News, Kerala Vartha.